Aqtóbelik azamat munaı kompanııasyna jumysqa ornalastyramyn dep 7 adamdy aldaǵan
AQTÓBE. QazAqparat – Qandyaǵash qalasynyń jumyssyz turǵyny Muǵaljar aýdanynyń 7 adamyn aldap soqqan, dep habarlaıdy «QazAqparat» HAA menshikti tilshisi PD baspasóz qyzmetine silteme jasap.
«Qandyaǵash qalasynyń jumyssyz turǵyny vahtalyq ádispen munaı kompanııasyna jumysqa ornalastyramyn dep ýáde berip, Muǵaljar aýdanynyń 7 azamatyn aldap soqqan. Ol jumysqa ornalastyrý úshin adamdardan 105 myń teńgeden aqsha jınap alǵan. Keıin olardy Aqtaý qalasyna poıyzben jiberip, adamdar kútip alady dep ýáde bergen. Alaıda jábirlenýshilerdi eshkim kútip almaǵan. Sóıtip olar polıtsııaǵa júgingen», - dedi PD baspasóz hatshysy Erbolat Sarqulov.
Atalǵan faktiler negizinde «Alaıaqtyq» baby boıynsha sotqa deıingi tergeý júrip jatyr. Ustalǵan azamat kinásin moıyndady.
Polıtsııa aldanǵandardyń kóp ekenin joqqa shyǵarmaıdy jáne jábirlenýshilerden Muǵaljar polıtsııa bólimine habarlasýdy suraıdy.
