Aqtóbelik azamat bomba qoıyldy dep eki ret jalǵan habar bergen
Aqtóbe qalalyq polıtsııa basqarmasynyń «102» nómirine belgisiz bireýden qońyraý tústi. Qońyraý shalǵan er adam Muǵaljar aýdany Aqkemir aýylyndaǵy temirjol vokzalynda «bomba» bar ekenin habarlady. Arada birneshe mınýt ótken soń dál sol adam qaıta habarlasyp, Aqtóbe qalasy, Qarǵaly eldi mekenindegi dúkenderdiń birinde de «bomba» qoıylǵanyn aıtqan.
«Qońyraý shalýshy kórsetken oryndarǵa qyzmetkerler jiberildi. Arnaıy bólimshe saperleri tekserdi. Jarylǵysh zat tabylǵan joq. Sonymen birge Muǵaljar aýdany Aqkemir aýylynyń ǵımaratynda tekserý júrgizilip, nátıjesinde jarylǵysh zat tabylmady. Іzdestirý kezinde oblystyq PD Ekstremızmge qarsy is-qımyl basqarmasynyń qyzmetkerleri buryn sottalǵan Muǵaljar aýdanynyń 31 jastaǵy turǵynyn anyqtap, mas kúıinde polıtsııa bólimine jetkizdi. Zattaı dálel retinde uıaly telefony tárkilendi», - dep habarlady oblystyq PD baspasóz qyzmetiniń jetekshisi Erbolat Sarqulov.
Qazir Qylmystyq kodekstiń «Daıyndalyp jatqan terrorızm aktisi týraly kórineý jalǵan habarlaý» baby boıynsha sotqa deıingi tergeý bastalǵan. Osy baptyń sanktsııasy 5 myń aılyq eseptik kórsetkishke deıingi mólsherde aıyppul salýdy ne sol mólsherde túzeý jumystaryn ne bes jylǵa deıingi merzimge bas bostandyǵyn shekteýdi ne sol merzimge bas bostandyǵynan aıyrýdy kózdeıdi.