Aqtóbelik áıelder jún tútip, kórpe tigýdi bızneske aınaldyrdy
AQTÓBE. QazAqparat - Aqtóbe oblysy, Mártók aýdanynda turatyn úı sharýashylyǵyndaǵy áıelder kásippen aınalysa bastady. «Bastaý Bıznes» baǵdarlamasy boıynsha aýdannyń 100 turǵyny kásipkerlik negizderin úırendi, dep habarlaıdy QazAqparat tilshisi.
Aqtóbe oblysy, Mártók aýdanynyń turǵyny Turǵan Shamshetova «Damý» qorynan qarjy alyp, jún óńdeý kásibin bastady. «Bastaý Bıznes» jobasy arqyly bilimin jetildirgen kásipker aldymen jún men maqta óńdeıtin qural-jabdyqty satyp aldy.
«Jún jýý, tútý, tazalaý kóp ýaqyt alady. Al jańa apparat jumysty jeńildetti. «Bıznes Bastaý» jobasy aýyl turǵyndary úshin eń tıimdi joldardy usyndy. Qyz jasaýyn daıyndap, kórpe tigýdi qolǵa aldym»,- dedi kásipker Turǵan Shamshetova. Aýyl kásipkeri jumyspen qamtý ortalyǵy arqyly bir adamdy jumysqa alyp, qolóner buıymdaryn oblys ortalyǵyna tapsyryspen jetkizip jatyr. Sheber kórpe tigip, jastyq daıyndaıdy. Tereze japqysh, júnnen ulttyq kıimder tigip júr. Jún tútetin apparattyń qyzmetin aýyl turǵyndary paıdalanady. Olar túıe, qoı júninen jasalǵan kórpelerin jańartyp jatyr.
«Túrli kórme-jármeńkelerge qatysyp, semınarlarda biliktilik arttyrý múmkindikterin paıdalanyp júrmin. Aldaǵy ýaqytta ulttyq buıymdar kórmesin jasap, óz qolymmen tikken buıymdardy kórshilikke usynǵym keledi. Kez kelgen áıeldiń qolynan is keledi. Tek ıne men jiptiń ilimin bilý kerek»,- dedi Turǵan Shamshetova. Ol aldaǵy ýaqytta mal baǵatyn sharýalarmen baılanys ornatyp, jún satyp alýdy kózdep otyr.
Al kásipker Saltanat Jaqsyǵarına sútti iri sút óńdeý tsehyna tapsyrady. Ol súttiń ár lıtrin 75 teńgeden ótkizip júr.
«Bıznes jospar jasap, 2 mıllıon teńge aldym. Qarjyǵa 7 sútti sıyr satyp alyp, qazir ónimdi tsehqa ótkizip otyrmyn. Qarjynyń bir bóligine mal azyǵyn satyp aldym. Qurylys júrgizip, mal basyn arttyrý josparymda bar. Ári qus baǵamyn. Osy jolmen kásipti bastap, tabys tabýǵa kiristim»,- dedi Saltanat Jaqsyǵarına. Maı men qaımaq, irimshik, aıran satatyn aýyl kásipkeriniń turaqty satyp alýshylary bar.
Aıta keteıik, Aqtóbe oblysy, Mártók aýdanynda bıyl quny 54 mıllıon teńge bolatyn 20 bıznes joba qarjylandyryldy. Taǵy birneshe kásipker bıznes bastaý úshin qujat rásimdep jatyr.
