Aqtóbelik áıel indet juqtyrǵandar týraly jalǵan aqparat taratqany úshin jazalandy
AQTÓBE. QazAqparat - 56 jastaǵy aqtóbelik karantın kezinde jalǵan aqparat taratqany úshin ákimshilik jaýapkershilikke tartyldy, dep habarlaıdy QazAqparat tilshisi.
Áleýmettik jelilerge monıtorıng júrgizý barysynda polıtseıler 56 jastaǵy áıeldi ustady. Ol qaladaǵy qoǵamdyq tasymaldaý kompanııasynda jumys isteıdi. WhatsApp messendjerinde jalǵan aqparat taratqan.
«Aýdıo jazbada áıel Reseıden Aqtóbege 500 adamdy avtobýspen ákelgeni, taǵy bir top stýdent keletinin aıtqan. Іndet juqtyrǵandar sany statıstıka boıynsha áldeqaıda kóp jáne aýrýhanalar toldy degen aqparat taratqan. Alaıda bul aqparat shyndyqqa sáıkes kelmeıdi», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, QR ÁQBtK-niń 478-baby boıynsha ákimshilik hattama toltyrylyp, Aqtóbe qalasynyń mamandandyrylǵan ákimshilik soty 40 AEK kóleminde aıyppul saldy. Aqtóbe oblystyq polıtsııa departamenti jalǵan aqparat taratpaı, tek resmı derek kózderine senýdi suraıdy.
