Aqtóbelik aıaqdopshylar Kıshınevtiń «Rapıdimen» 0:0 bolyp tarqasty
ALMATY. 20 qańtar. QazAqparat - 19 qańtar kúni Túrkııada oqý-jattyǵý jıynyn ótkizip jatqan «Aqtóbe» fýtbol komandasy Moldovanyń Kıshınev qalasynyń "Rapıd" komandasymen sparrıngtik kezdesý ótkizdi.
Bastapqy kezde jumaǵa josparlanǵan bul oıyn, aýa raıynyń qolaısyzdyǵyna baılanysty senbige qaldyrylǵan edi. Onda eshbir komanda qarsylastar qaqpasynan sańylaý taba almaı, esep 0:0 kúıinde ózgerissiz qaldy.
Endi aqtóbelikter dúısenbi kúni bul jıyndaǵy aqtyq kezdesýin Baký qalasynyń "Neftchı" komandasymen ótkizbek.
Ázirbaıjan Premer-lıgasynda óner kórsetetin Beıýkaga Gadjıev jattyqtyratyn bakýlikter 2011/2012 jylǵy maýsymda el chempıony atanǵan bolatyn. 2008 jyly Intertoto kýbogynyn fınalısi atanǵan "Neftchı" Ázirbaıjan chempıonatynda sońǵy 22 jylda 8 dúrkin chempıon, 3 ret kúmis, 5 ret qola júldeger atandy. Sondaı-aq bes ret Ázirbaıjan kýbogyn jáne 2006 jyly TMD jáne Baltyq elderiniń "Dostastyq" kýbogyn ıelenip, 2005 jyly fınalıst boldy.
