Aqtóbelik aýyl kásipkeriniń jospary - kooperatıv qurý

Oıyl - biryńǵaı mal ósirýmen aınalysatyn aýdan. Óndiristi oryndardan, temirjoldan shalǵaı jatqan óńir halqynyń barlyq turmys-tirshiligi tórt túlik malǵa táýeldi. Soǵan qaramastan, búgingi kúni aýdanda mal sharýashylyǵynan basqa kásipkerlikpen aınalysyp, jańa jobalardy qolǵa alyp jatqan azamattar bar.

Qýanysh Qystaýbaev - osy azamattardyń qatarynda júrgenderdiń biri. Ol elimiz toqyraýǵa ushyrap, aýyldarda mal sany azaıyp jatqan kezde óziniń qarajatymen atakásipti damytýǵa bet burypty. Qazir onyń sharýashylyǵynda 87 iri qara, 90 jylqy, 100-den astam qoı bar.

«Negizgi mamandyǵym - tarıhshy. Almatydaǵy Qazaq ulttyq ýnıversıtetiniń tarıh fakýltetin bitirdim. Aqtóbe qalasynda óz mamandyǵym boıynsha 6 jyl jumys jasadym. 1994 jyly Oıylǵa otbasymmen kóship kelip, osy kásipti qolǵa aldym. Basynda mal sany az bolǵanymen, qazir sharýashylyǵymyz birqalypty damyp keledi. Kúzde malymyzǵa azyqty ózimiz daıyndap alamyz. Qojalyqta 4 traktor, shóp shabatyn tehnıkalarymyzdyń bári bar. Qazir sharýashylyqta 10 shaqty jumysshym bar. Olar qysta mal baǵýǵa, jazda shóp daıyndaýǵa kómektesedi. Aı saıyn jalaqylaryn tólep, shama-sharqym jetkenshe kómektesip turamyn. Buryn bizdiń óńirde qoı kóp edi. Sońǵy jyldary sharýalar onyń sanyn azaıtyp jatyr. Qazaq «Mal ósirseń, qoı ósir» demekshi, qazir meniń qojalyǵymda 100 shaqty qoı bar», - deıdi sharýa.

Onyń aıtýynsha, búgingi kúni sharýa qojalyǵynyń janynda mal soıý tsehy jumys jasaıdy. Tseh osydan úsh-tórt jyl buryn salynǵan. Qazir aýyl halqy osy tsehqa aparyp, malyn soıdyrady. Sondaı-aq aýdan ortalyǵyndaǵy Oıyl agrarlyq kolledjiniń oqýshylary osy tsehqa kelip, tájirıbeden ótedi. Munda bilim alýshylar maldy soıýdyń ádis-tásilderin úırenedi. Mamandardan keńes alyp, sharýalarmen áńgimelesedi.

Bıylǵy jyly sharýalarǵa oblys ákimi Berdibek Saparbaev kooperatıvter qurý mindetin qoıǵany belgili. Osyǵan baılanysty qazir  Qýanysh Qystaýbaev Kóptoǵaı aýyldyq okrýginen kooperatıv qurýdy josparlap otyr.

«Kooperatıv negizinen sút qabyldaýmen aınalysady dep josparlanýda. Alaıda kooperatıv qurý úshin jeke tulǵa nemese sharýa qojalyǵy bolsyn, onyń quramynda 20 adamnan kem bolmaýy qajet. Sondyqtan qazir osy bastamany qolǵa alyp jatyrmyn.

Jýyrda oblysymyzǵa aýyl sharýashylyǵy mınıstri Asqar Myrzahmetov kelip, jańa qurylǵan aýyl sharýashylyǵy kooperatıvteri jumysynyń qanshalyqty jolǵa qoıylǵanyna nazar aýdaryp, sharýalarmen kezdesti. Sol kezde mınıstr sút óndirýshilerge árbir lıtr sútke 20 teńgeden sýbsıdııa tólenetini týraly aıtty. Bul da bolsa bizge úlken kómek. Jyl saıyn sýbsıdııa alyp otyrsaq, kooperatıv jumysyna oń yqpal etedi. Sondaı-aq aldaǵy ýaqytta memlekettik baǵdarlama arqyly nesıe alyp, sol qarjyǵa sút tasıtyn avtokólik pen sútti salqyndatatyn tehnıka satyp alamyz», - deıdi ol.

Sonymen qatar bıyl sharýa asyltuqymdy iri qara malyn satyp alý úshin «Sybaǵa» baǵdarlamasy arqyly memleketten 17 mıllıon teńge nesıe alýǵa qujattaryn tapsyrǵan. Jýyrda nesıesin alyp, Oraldan asyltuqymdy iri qara satyp almaq.

Qazir óńirde memlekettik baǵdarlamanyń kómegimen nesıe alyp, óz isin damytyp, asyltuqymdy iri qara, qoı ósirip otyrǵan sharýashylyqtar kóp. Bıylǵy jyly men de asyl tuqymdy iri qara alýdy uıǵardym. Qazaqtyń aqbas sıyryn ósirip, ónim kólemin kóbeıtýdi kózdep otyrmyn», - deıdi ol.

Qýanysh Qystaýbaev búgingi kúni aýdanda mal sharýashylyǵyn damytýmen qatar  naýbaıhana ashyp, óz kásibin dóńgeletip otyr. Sharýanyń zaıyby Kúnjamal Álip óz atynan kásipkerlik nysandaryn ashyp, qazir aýdan halqyn azyq-túlik, nan, un, et ónimderimen qamtamasyz etip otyr.

- Aýylǵa kelgen soń burynǵy keńes dáýirinen qalǵan bos turǵan naýbaıhanany qalpyna keltirip, jóndep, sonyń ornynan óz qarjyma naýbaıhana ashtym. Bul isti keıin zaıybym Kúnjamal qolǵa aldy. Ótken jyly 18 mıllıon teńge nesıe alyp, naýbaıhanamyzdy keńeıtip, oǵan qajetti zamanaýı qurylǵylardy satyp aldyq.  Búgingi kúni onda nan, kondıterlik ónimder, sondaı-aq tushpara, tartylǵan et (farsh) satylady. Sondaı-aq aýdandaǵy birqatar mektepterde ashanany jalǵa alyp, oqýshylarǵa ystyq tamaq daıyndaımyz. Qazir qyryqqa jýyq adamdy jumyspen qamtyp otyrmyz. Naýbaıhanada nan, kondıterlik ónimderge arnaıy tapsyrys ta qabyldaımyz, - deıdi sharýa.

Qazir Oıyl aýdanynyń ortalyǵynda «Álip» jeke kásipkerliginiń ashqan shaǵyn marketi de jumys jasaıdy. Onda azyq-túlik túrleri  aýdandaǵy áleýmettik jaǵdaıy tómen otbasylarǵa  arzan baǵamen usynylady.

Halyqqa qyzmet etip, búginde aýdandaǵy 50-ge jýyq turǵyndy turaqty jumyspen qamtamasyz etip otyrǵan sharýanyń áli de alǵa qoıǵan maqsattary men josparlary kóp. - Bári de eńbekpen keletin dúnıe, eń bastysy, elimiz aman bolsyn! Búginge deıingi qol jetkizgen osy jetistikterimizdiń barlyǵy Táýelsizdiktiń arqasynda. Sondyqtan Aqtóbe halqyn el Táýelsizdiginiń 25 jyldyǵymen quttyqtaımyn!- deıdi Qýanysh Qystaýbaev.