Aqtóbelik aýǵan soǵysynyń ardagerleri saılaýda óz tańdaýyn jasaıdy
Q.Jubanov atyndaǵy Aqtóbe memlekettik óńirlik ýnıversıtetindegi aýǵan soǵysy ardagerlerine arnalǵan bólme ashylyp, búgin sol ortalyqta basqosý boldy. Ardagerler Memleket basshysy Qasym - Jomart Toqaevtyń kezekten tys saılaý týraly úndeýin qoldap, elimizdiń bolashaǵy úshin ár adam daýys berýge qatysýy qajet ekenin aıtty.
«Biz saılaý arqyly aldaǵy baǵytymyzdy, bolashaǵymyzdy aıqyndaı alamyz. Qazaqstan sekildi memleket tek alǵa umtylyp, damý jolyn jalǵastyrýy kerek. Bul jolda prezıdenttiń róli orasan. Sondyqtan kezekten tys saılaýdy qoldap, biz, aýǵan soǵysynyń ardagerleri belsendilik tanytý qajet degen oıdamyz», - dedi «Er Baqyt» sporttyq-patrıottyq birlestiginiń tóraǵasy Marat Qoılybaev.
Aldaǵy ýaqytta aýǵan soǵysynyń ardagerleri stýdenttermen de kezdesedi.
«Prezıdenttik saılaýdy kútkenimiz anyq. Sondyqtan Memleket basshysy Qasym - Jomart Toqaevtyń sheshimi durys bolǵanyn aıtyp, qazir daıyndyqty bastap kettik. Biz óz kezegimizde jastarmen kezdestik, olardy belsendi bolýǵa, óz tańdaýyn jasaýǵa shaqyrdyq», - aýǵan soǵysynyń ardageri Gýmer Galeev.
Aıta keteıik, Aqtóbede 900-den astam aýǵan soǵysysnyń ardageri bar. Keńes áskeriniń aýǵan jerinen shyǵarý kúnine oraı Aqtóbede bıyl ardagerlerge arnap arnaıy kabınet ashyldy. Munda olar tanymdyq kezdesýler ótkizip, jastardy patrıottyqqa, elin-jerin súıýge tárbıeleıdi.
