Aqtóbelik atasynan qalǵan ańshy myltyǵyn polıtsııaǵa tapsyrdy
AQTÓBE. QazAqparat - Aqtóbelikter aktsııa kezinde 48 qarýdy polıtsııaǵa tapsyrdy, dep habarlaıdy QazAqparat tilshisi.
Aqtóbe oblysynyń aýmaǵynda zańsyz saqtalǵan qarý-jaraqty satyp alý respýblıkalyq aktsııa júrgizilip jatyr. Aktsııa bastalǵan 3 kúnde 48, onyń ishinde 6 birlik oıyq jáne 42 tegis uńǵyly qarý tapsyryldy.
«Oıyl aýdanynyń 20 jastaǵy turǵyny polıtsııa bólimine 2 qarý tapsyrdy. Olar: 16 kalıbrli IJ ańshy myltyǵy jáne TOZ-8 oıyq unǵyly myltyq. Jigittiń aıtýynsha, myltyq marqum atasynan qalǵan. Aktsııa týraly bilip, ákesimen aqyldasyp, olardy tapsyrýǵa bekingen. Zańsyz saqtalǵan qarý-jaraq zattaryn, oq-dárilerdi jáne jarylǵysh zattardy óz erkimen tapsyrýǵa nıet bildirgen azamattar qylmystyq jáne ákimshilik jaýapkershilikten bosatylady. Atys qarýyn, oq-dárilerdi, jarylǵysh zattardy aqshalaı syıaqy úshin tapsyrýǵa nıet bildirgen kez kelgen azamat aýmaqtyq polıtsııa bólimine baryp, ótinish bere alady»,- dep habarlady oblystyq PD baspasóz qyzmetiniń jetekshisi Erbolat Sarqulov. Ótinishti polıtsııanyń kezekshi bólimderine berýge bolady. Telefon arqyly aqparat bergen kezde qarý saqtalǵan jerge polıtsııa qyzmetkeri jiberiledi.
