Aqtóbelik ata-analar shyǵarmashylyq ortalyqty senimgerlik basqarýǵa berýge qarsy
AQTÓBE. QazAqparat - Aqtóbede balalar jáne jasóspirimder shyǵarmashylyq ortalyǵynda shý shyqty. Ata-analar ortalyqty senimgerlik basqarýǵa berýge qarsy, dep habarlaıdy QazAqparat tilshisi.
Aqtóbedegi memlekettik shyǵarmashylyq ortalyǵynda qosymsha bilim alý 2-7 myń teńge aralyǵynda bolyp bekitilgen. Ortalyqta 1 myńnan astam bala tárbıelense, onyń 40 paıyzy tegin bilim alady. Al 5 paıyzynda arnaıy jeńildik bar. Ortalyqtyń senimgerlik basqarýǵa beriletinin estigen ata-analar jınalys ótkizip, óz qarsylyqtaryn bildirdi.
«Munda 10 jyldan beri kelip, nemerelerimniń qosymsha bilim alýyna kómektesip júrmin. Ortalyq jyly, jaıly. Eshkim shaǵym aıtyp, renjigen emes. Al senimgerlik basqarýǵa beriletinin estip, júregimiz aýyryp júr. Bul jer jekeniń qolyna ótse, aqysy ósip, biz qınalamyz», - dedi ata-analardyń biri Serikǵaısha Alpıeva.
Ata-analar májilis zalyna jınalyp, óz qarsylyqtaryn ashyq bildirdi. Keıbiri bir emes, birneshe balasyn shyǵarmashylyq ortalyǵyna ákelip júr.
«Biz senimgerlikke, jekege berýge qarsymyz. Eger jekege berse, olar óz baǵasyn qoıady. Al bizde qomaqty qarjy joq. Keleshegimizdi oılasaq, balalarǵa durys tárbıe bergimiz kelse bári memlekette qalýy tıis», - dedi ata-ana Gúljamal Cherkasova.
Qalalyq shyǵarmashylyq ortalyǵynda tegin aǵylshyn tili, shahmat úıirmeleri bar. Ortalyq dırektory Alfııa Nyǵmatýllınanyń aıtýynsha, 71 úıirme bolsa, onda 52 pedagog dáris beredi. Jyl saıyn shaǵyn jóndeý júrgiziledi. Qalalyq ákimdik ata-analardyń máseleni durys túsinbegenin, ortalyq senimgerlik basqarýǵa berilmeıtinin aıtyp berdi. Biraq jergilikti bıýdjet keler jyly balalar úshin memlekettik tapsyrys berýge kóshedi.
«Qazirgi kezde qalada 15 qosymsha bilim berý mekemesi bar. Onda 15 myńnan astam bala tárbıelenip jatyr. Olardyń senimgerlik basqarýǵa berý qarastyrylǵan joq, jekege basqarýǵa berilmeıdi. Qalada 100-den astam repetıtorlyq ortalyq bar. Barlyǵy 40 myńnan astam bala sol jerde bilimin jetildirip júr. Biz sol jerlerge memlekettik tapsyrys berýdi josparlap otyrmyz», - dedi Aqtóbe qalalyq bilim bóliminiń basshysy Kúlparshyn Aıdarhanova.
Eske salsaq, buǵan deıin Aqtóbede zırattar senimgerlik basqarýǵa berildi. Keıin balabaqshalar da senimgerlik basqarýǵa tapsyryldy. Qazir barlyǵy 9 balabaqsha senimgerlikke berildi. 2018-2019 jyldyń jospary boıynsha taǵy 10 baqsha 5 jylǵa senimgerlik basqarýǵa ótedi. 
