Aqtóbelik ata-analar mektepke jańa parta satyp alyp bermek boldy
AQTÓBE. QazAqparat - Aqtóbe qalasyndaǵy №22 mekteptiń ata-analary kún saıyn kıimin búldirip keletin balalary úshin jańa parta satyp alýǵa jınaldy. Ata-analar arasyndaǵy daý jelige shyǵyp, mektep dırektory men synyp jetekshisi túsinikteme jazdy, dep habarlaıdy QazAqparat tilshisi.
Aqtóbe qalasyndaǵy №22 orta mektepte 1 myńǵa jýyq bilim alady. Jańa oqý maýsymynda mekteptiń 2 synybyna parta satyp alyndy. Memlekettik tapsyryspen alynǵan parta bastaýysh klasqa bólingen. Al joǵary synyp oqýshylary eski parta, ústelde otyr. Kıimderin búldirip keletin oqýshylardyń ata-analary bul joly jınalys ótkizip, jańasyn satyp alýdy josparlaǵan. Biraq keıbir ata-ana bul usynysqa qarsy shyǵyp, beınematerıaldy áleýmettik jeli arqyly taratyp jiberdi. Qazirgi ýaqytta Aqtóbe qalalyq bilim bólimi mektep dırektory men synyp jetekshisinen túsinikteme alyp jatyr.
«Aqtóbe qalasy boıynsha barlyq mektep basshylyǵyna synyp qoryna, túrli qajettilikterge aqsha jınaýǵa tyıym salynǵany týraly eskertý berildi. Buıryqty mektep dırektorlary biledi. Sonymen qatar, bıyl barlyq mektepke eki synypty qamtıtyn parta berildi. Al №22 mekteptegi ata-analary jıyny týraly beınejazba qazir zerdelenip jatyr. Jınalysta mektep basshylyǵy men synyp jetekshisi joq. Ata-analar ózderi jıyn ótkizip, pikirtalas ótkizip jatyr. Bireýi balasynyń jaqsy partada otyrǵanyn qalaǵan bolýy múmkin. Basshylyq tek ata-analardy synyp ishinde jalǵyz qaldyrǵany úshin jaýap beredi»,- dedi Aqtóbe qalalyq bilim bóliminiń basshysy Indıra Beksultanova.
Aqtóbe qalasyndaǵy №22 orta mektep dırektory Aıgúl Aldııarova synyp ishindegi partanyń mújilgenin rastady.
«Ana-analar demeýshilik jasap, partalardy aýystyrǵysy keldi. Mekteptiń materıaldyq-tehnıkalyq bazasyn nyǵaıtýǵa arnalǵan usynysty ózderi aıtyp, ata-analar jınalysta talqyǵa saldy. Eshkim mindettegen joq. Negizi bıyl bizge parta berildi. Biraq bári bastaýysh synypqa bólindi. Keıin taǵy da qarjy bólinip, parta aýystyrý jumystary jalǵasady», - dedi Aıgúl Aldııarova.
