Aqtóbelik arheologtar Bopaı hanym qorymyn zertteýge qarjy kútip otyr
Qazaqstannyń kıeli jerler geografııasyna Aqtóbeden 10 nysan engizildi. Olar: Eset batyr, Qobylandy batyr, Abat Baıtaq, Dosjan ıshan, Eset Kótibar, Isataı batyr keseneleri men Han molasy, Jamanshyń meteorıti, Oısylqara men Bopaı hanym qorymy. Bárinen buryn Bopaı hanym qorymy zertteýdi qajet etip tur. Sebebi, Kenesary hannyń batyr qaryndasy Bopaı hanymnyń jerlengen jeri Aqtóbe oblysy, Áıteke bı aýdany, Kilemjaıǵan aýylynan soltústik-batysqa qaraı 15 shaqyrym dep kórsetilgen derekti tarıhshy Serik Ájiǵalı óz monografııasynda jazǵan. Biraq osydan basqa naqty aqparat pen zertteý joq. Tipti beıit qırap, búlinip jatyr.
«Bopaı hanym qorymyn zertteýge qarjy suraldy, biraq bir sheshimi áli shyqpady. Eger qarjy bólinse qorymǵa etnogrof, arheolog, tarıhshy, zertteýshiler barady. Jaqyn aýylda turatyn qarııalarmen sóılesý, derek jınaý júredi. Qarjy bolsa Orynbor muraǵatynan Bopaı hanymǵa qatysty derekter jınalady. Qazirgi kezde Qazaqstannyń kıeli jerler kartasyna engen nysandar ishinen tek Bopaı hanym zerttelmeı tur»,- dedi Aqtóbe oblystyq tarıhı-mádenı muralardy zertteý, qorǵaý, qaıta qalpyna keltirý ortalyǵynyń dırektory Aslan Mamedov.
Aıta keteıik, Bopaı beıitinen ózge Baıǵanın aýdanyndaǵy Jem ózeni boıynsha Qudabaı batyr qorymyn zertteý josparda tur. Ortalyq dırektory Aslan Mamedovtyń aıtýynsha, Oıyl aýdanyndaǵy Kerýen saraı keshenin qaıta qalpyna keltirýdi kózdep otyr. Al Dosjan ıshan meshiti men Sáken ıshan meshitin qaıta qalpyna keltirý úshin jobalyq-smetalyq qujat da daıyndaý kerek.
«Taıaýda biz Qazaqstannyń kıeli jerler tizimine engen 10, oblystyq mańyzy bar 34 nysandy kezeń-kezeńimen aralap, bárin sýretke túsirip, aqparat jınaımyz. Ári jańa nysandardy baǵdarlap, málimetter jazamyz. Munyń bári Batys Qazaqstannyń entsıklopedııasyna jınaqtalyp jatyr. Aldaǵy ýaqytta Aqtóbeniń kıeli jerler entsıklopedııasy jasalady»,- dedi Aslan Mamedov.
Aqtóbe oblystyq mádenıt basqarmasynyń habarlaýynsha, Bopaı hanymdy zertteýge qarjy áli bólingen joq. Mamandar qarjy bólý jumysynyń qashan sheshiletinin de bilmeıdi.
