Aqtóbelik ardagerler saılaýda belsendi bolýǵa shaqyrdy

AQTÓBE. QazAqparat - Aqtóbede ardagerler saıabaqqa jınalyp, maýsymda ótetin prezıdent saılaýynda belsendi bolýǵa shaqyrdy. Ári ózderi saılaýǵa qatysyp, alǵashqylardyń qatarynda daýys beretinin aıtty, dep habarlaıdy QazAqparat tilshisi.

Aqtóbe qalasyndaǵy ardagerler keńesi búgin el úshin mańyzdy oqıǵa týraly oılaryn aıtty. Ár jyldary eńbek etip, beınettiń zeınetin kórip otyrǵan olar ózderi jıi basqosatyn saıabaqta kezdesti.

«Aqtóbe qalasynda 40 myńnan astam ardager bar. Olardyń arasynda soǵys, tyl ardagerleri men zeınetkerler bar. Al qala boıynsha ár jerde 81 ardagerler keńesi jumys istep tur. Saılaý kezinde bárimiz birigip, daýys berýge baramyz. Sebebi bul tarıhı kún bolmaq. Qazaqstan óziniń ekinshi prezıdentin saılaıdy. Mundaı kezde ár adam bolashaǵy úshin tańdaý jasaýy tıis», - Aqtóbe qalalyq ardagerler keńesi tóraǵasynyń orynbasary Hamza Qýan.

Ardagerler búgingi basqosýda Memleket basshysy Qasym - Jomart Toqaevtyń úndeýi týraly da aıtty. Bul elimizdiń damý qarqynyn arttyryp, turaqtylyqty saqtaýǵa baǵyttalǵan sheshim.
«Biz ózimizge kerek, elimizdiń damýyn eseleıtin adamǵa daýys beremiz. Ardagerler ózgelerge úlgi bolyp, daýys berý kezinde jastardy da janyna ertedi. Osy isimiz arqyly bolashaǵymyzdyń bári óz qolymyzda ekenin kórsetkimiz keledi», - Hamza Qýan.