Aqtóbelik ardagerler otbasy qundylyqtaryna nemquraıly qaraıtyn jastarǵa alańdaýly
AQTÓBE. QazAqparat - Aqtóbede ardagerler uıymynyń 30 jyldyǵyna arnalǵan konferentsııa ótti. Jıyn kezinde ardagerler ózderin alańdatqan máseler jaıynda aıtty, dep habarlaıdy QazAqparat tilshisi.
Ardagerlerdiń usynys-tilekterin tyńdaýǵa, ulttyq qundylyqtardy dáriptep, jastar tárbıesine baǵyttalǵan jumysty talqylaýǵa arnalǵan jıynǵa buryn aýdan, aýyldy basqarǵan, tynymsyz eńbek etip, el damýyna úles qosqan aǵa býyn jınaldy. Aqtóbe oblystyq ardagerler keńesiniń tóraǵasy Keńes Birmanovtyń aıtýynsha, óńirde 88 myńǵa jýyq ardager bar. Onyń 92-si Uly Otan soǵysynyń ardageri, 7 myńnan astamy tyl eńbekkeri.
«Aǵa býyn ókilderiniń basty maqsaty - atadan balaǵa mıras bolyp kele jatqan ulttyq jádigerlerimizdi, salt-dástúrimizdi dáripteý, otbasy qundylyqtaryna basa nazar aýdarý, tilimiz ben dinimizdi, mádenıetimizdi qurmetteý jumystaryn jandandyrý. Ásirese jastardyń tárbıesine asa kóńil bólip, olardy qarapaıymdylyq pen qaıyrymdylyqqa, únemshildikke úıretý kerek. Qazirgi kezde otbasynyń búgini men keleshegi úlken problemaǵa aınalyp otyr. Batysqa eliktegen kóptegen jastarymyz ómirge tym jeńil qaraıtyn boldy. Elimizde ajyrasý jyldan-jylǵa beleń alyp barady. Aqparattyq basylymdarda keltirilgen derekter boıynsha Qazaqstanda nekesiz týǵan balalar sany 80 myńǵa jetken. Jasandy túsik jasatý 150 myńnan 400 myńǵa ósken. 182 myńnan astam qyz 30 jastan assa da áli turmys qurmaǵan. Osynyń bári búkil qoǵamdy, onyń ishinde ardagerlerdi de oılandyratyn máseleler. Biz urpaǵymyzdy eldiń patrıoty etip tárbıeleý úshin úlken úles qosýymyz kerek»,- dedi Keńes Birmanov.
Onyń aıtýynsha, ár aýylda, aýdanda aqyl-keńes beretin ortalyqtar uıymdastyryp, oǵan sol óńirge sózin júrgize alatyn, aıtary bar azamattardy tartý qajet. Sol kezde jastar men ardagerler arasynda túsinistik, senimdilik ornaıdy.
«Barlyǵy otbasydan bastalady. Keıingi kezde halqymyzǵa, memleketimizge jat dástúrli emes dinder, qyzdardyń kıimi, ekpeden bas tartý máselesi alańdatady. Bılik jumys istep, shara qoldanyp jatyr. Biraq kóp nárseni aqylmen, áńgimemen, kezdesýmen sheshýmiz qajet. Osy jerde bizge sizderdiń kómekterińiz qajet. Júrgen jerde aıtyp, nasıhattaǵan jón. Sebebi, bári bizdiń balamyz, nemeremiz, aǵaıynymyz, jekjatymyz. Kóp nárse adamnyń sana-sezimine baılanysty. Sanasy bar bala basqa dinge, buzaqylyqqa, zań buzýshylyqqa barmaıdy»,- dedi Aqtóbe oblysynyń ákimi Berdibek Saparbaev.
Óńir basshysy balalar tárbıesinde ata-analar tarapynan baqylaýdyń joq ekenin aıtty.
Kezdesý kezinde 52 ardager Ortalyq ardagerler keńesiniń arnaıy medalimen, dıplommen, oblys ákiminiń alǵys hattarymen marapattaldy.
