Aqtóbelik ardager názik jandy jigitterdiń artýyn áıel ustazdardyń kóptiginen kórýde
AQTÓBE. QazAqparat - Qoǵamda qyz minezdi azamattar kóbeıip ketti dep esepteıtin aqtóbelik eńbek ardageri, er balalarǵa bilim beretin ustazdar er adamdar bolýy tıistigin aıtýda, dep habarlaıdy QazAqparat tilshisi.
Búgin Aqtóbe qalasynyń turǵyny Kóshkinbaı Ahmetov óńirdiń 2017 jylǵy áleýmettik-ekonomıkalyq qorytyndysyna arnalǵan keńeske qatysyp, oblys ákimi Berdibek Saparbaevqa saýal qoıdy.
«Qazir qyz minezdi uldar kóbeıip barady. Sebebi, balabaqshada áıelder tárbıeleıdi, mektepte áıelder sabaq beredi. Kolledj ben ózge oqý oryndarda taǵy da áıelder basym. Bul bolashaqta er balalardyń sheshim qabyldaýyna keri áserin tıgizedi. Ekonomıka, óndiriske barǵan er azamattardyń naqty sheshim qabyldaı almaýy múmkin. Sondyqtan balabaqshadan bastap balalardy er minezdi etip tárbıeleýimiz kerek. Demek joǵary oqý oryndaryndaǵy pedagogıka mamandyǵyna er balalardy qabyldap, olarǵa kvota bólgen jón. Ári muǵalim bolyp jumys isteıtin er adamdardyń jalaqysyn kóterý qajet. Mektepterge er adamdardy jumysqa qabyldaǵan durys. Arnaıy baǵdarlama qabyldasaq, er minezdi azamattar ekonomıkamyzdyń ósimine septigin tıgizer edi»,- dedi ardager Kóshkinbaı Ahmetov.
Ardagerdiń ótinishi men usynysyn tyńdaǵan óńir basshysy Berdibek Saparbaev ár adam bárin ózinen bastaý kerektigin jetkizdi.
«Ár adam ózinen bastaý kerek. Biz usynysty eskerip, sizben kelisemiz. Memleket basshysy Nursultan Nazarbaev ta muǵalimderdiń eńbekaqysyn kóterýge Úkimetke tapsyrma berdi. Qańtar aıynan bastap muǵalimderdiń jalaqysy kóterildi. Al er balalardy pedagogıka salasyna tartý úshin bárimiz birge jumys isteýimiz kerek»,- dedi oblys ákimi.
