Aqtóbelik alaıaq joq kúshikterdi ınternette «satýmen» aınalysqan
PETROPAVL. QazAqparat - Aqtóbe oblysynyń týmasy áleýmettik jeliler arqyly joq kúshikterdi «satýmen» aınalysqany úshin jaýapqa tartyldy, dep habarlaıdy QazAqparat tilshisi.
Áleýmettik jelide arzan baǵamen mops kúshikteriniń satylatyny týraly habarlamany kórgen Petropavl turǵyny satýshyǵa habarlasqan. Áıel aldyn ala tólem jasap, «janýardyń jolyn qaraılaýmen» bolady. Biraz ýaqyt ótken soń satýshyǵa habarlasaıyn dese - nómiri sóndirýli.
«Kúdikti kim ekeni anyqtaldy. Ol Aqtóbe oblysynyń týmasy, mektepti endi ǵana bitirgen qyz eken. Onyń 11 ınternet-alaıaqtyq áreketine qatysy bolýy múmkin. Sonyń bárinde qyz asyl tuqymdy kúshikterdi «satyp» kelgen. Aldyn ala tólemniń mólsheri satyp alýshymen ózara kelisim negizinde, 30-80 myń teńge aralyǵynda belgilengen. Qyzdyń aılasyna ilingenderdiń kópshiligi - elorda turǵyndary», - deıdi baspasóz qyzmetiniń ókilderi.
Іs materıaldary Astana ishki ister departamentine berildi. «Alaıaqtyq» baby boıynsha sotqa deıingi tergep-tekserý júrip jatyr. Oǵan sáıkes, 4 myń AEK mólsherinde aıyppul salý nemese 4 jylǵa bas bostandyǵynan aıyrý jazasy belgilenýi múmkin.
Jyl basynan beri soltústikqazaqstandyq polıtseıler 13 ınternet-alaıaqtyq qylmysyn ashqan.
