Aqtóbelik alaıaq bıznes ortalyǵynan «vakansııalar bıýrosyn» ashqan
AQTÓBE. QazAqparat - Aqtóbede bıznes ortalyǵynan arnaıy keńse ashyp, turǵyndardy jumysqa ornalastyramyn dep aldaǵan kúdikti ustaldy. Polıtsııa qazir aldanǵan adamdardy izdestirip jatyr, dep habarlaıdy QazAqparat tilshisi.
Aqtóbe qalasyndaǵy Zaýyt polıtsııa bólimi birneshe adamnan aqsha alyp, jumysqa ornalastyrmaǵan kúdiktini ustady. Qazir 47 jastaǵy Temirbek Sultanǵalıev qamaýda otyr. Atyraý oblysynyń týmasyna qatysty Qylmystyq kodekstiń «Alaıaqtyq» baby boıynsha iz qozǵalyp, tergeý bastaldy.
«Temirbek Sultanǵalıev Aqtóbe qalasyndaǵy «Kapıtal Plaza» bıznes ortalyǵynan keńse jaldap, 2017 jyldyń jeltoqsan aıy men 2018 jyldyń naýryz aıyna deıin adamdardy aldap kelgen. Ol vahtalyq ádispen jumysqa ornalastyramyn dep ýáde berip, adamdardyń aqshasyn alǵan. Qazir kúdikti ýaqytsha tergeý ızolıatorynda otyr. Eger osy adamǵa aldanyp, aqshasyn ala almaı júrgen aqtóbelikter bolsa, Zaýyt polıtsııa bólimine habarlasýyn suraımyz», - dep habarlady oblystyq ІІD baspasóz qyzmeti.
Foto: novosti33.ru
