Aqtóbelik ákim ardagerge aýyr sóz aıtqany úshin aıyppul tóleıdi
AQTÓBE. QazAqparat - Aqtóbe oblysy Hromtaý aýdany Abaı aýylynyń ákimi Álibek Mustafın aýyr sóz aıtqany úshin aıyppul tóleıdi, dep habarlaıdy QazAqparat tilshisi.
Ákim men ardager arasyndaǵy kelispeýshilik sotqa jetti. Hromtaý aýdandyq soty Ákimshilik quqyqbuzýshylyq týraly kodekstiń 434-baby, 1-bólimi boıynsha Abaı aýylynyń ákimi Abaı Mustafınge qatysty isti qarady. Іs materıalyna súıensek, 2019 jyldyń 9 mamyry kúni saǵat 10:20-da Abaı aýylynyń ákimi Á.Mýstafın Ardager kóshesinde ornalasqan soǵys ardagerlerine arnalǵan eskertkish mańynda, ıaǵnı, qoǵamdyq orynda I.Arjıntti balaǵattap, qoǵamdyq tártipti buzǵan.
«Sot otyrysynda quqyqbuzýshy Á. Mýstafın óziniń kinásin moıyndamady. Jeńis kúnine arnalǵan saltanatty jıynda aýyl ákimi retinde quttyqtaý sóz aıtqanyn, sol kezde I.V.Arjınt kelip, ózine ardager retinde sóz berýin suraǵan. Ákim aýyl turǵyny Arjıntti ardeger emes dep saıabaqtyń kireberisinde eskertý jasaıdy. Aralarynda janjal týyndap, bir-birine balaǵat sózder, ıaǵnı, ákim naqty «ket qury» dep orysshalap aıtqanyn jasyrmady.
Jábirlenýshi I.V.Arjınt Abaı aýylynyń turǵyny jáne Semeı ıadrolyq polıgony ardageri. Soǵan sáıkes Álibek Mustafınge Ákimshilik quqyq buzýshylyq týraly kodeksiniń 434-babynyń 1-bóligimen kináli dep tanylyp, 5 aılyq eseptik kórsetkish mólsherinde, ıaǵnı, 12 625 teńge aıyppul salynsyn», - dedi sýdıa Saıagúl Jumashkına.
Abaı aýylynyń ákimi Álibek Mýstafın bul iske qatysty óz oıyn bildirdi. «Sot qaýlysyna kelispeımin, taǵy da aryzdanamyn. Sebebi ol sahanada turyp, ar-namysyma tıetin sózder aıtty. Men de aryz berip, sot turǵynǵa aıyppul salǵan bolatyn», - dedi Álibek Mýstafın.
