Aqtóbelik 20 jyldan beri Qazaqstan azamattyǵyn ala almaı júr
AQTÓBE. QazAqparat - Aqtóbeniń Qarǵaly aýdanynda 1999 jyldan beri turatyn Qalamqas Týraǵazına Qazaqstan azamattyǵyn ala almaı júr, dep habarlaıdy QazAqparat tilshisi.
Qalamqas Týraǵazına 1985 jyly turmysqa shyǵyp, keıin Qazaqstan táýelsizdigin alǵan kezde Reseı terrıtorııasynda qalyp qoıdy. Bes balanyń anasy 1999 jyly shekara asyp kelip, Qarǵaly aýdanyna qonys aýdardy. Sol jerde jeke sharýashylyqtarǵa kómektesip, jaldamaly qyzmet atqardy.
«Jaz aılarynda baý-baqshada jumys istedim. Kartop egip, jınaýǵa kómektestim. Keıbiri aqysyn berdi, ekinshileri azyq-túlikpen eseptesedi. Kúıeýim abaqtyǵa jabylyp, bes balanyń bárin ózim jetkizdim. Shynymdy aıtsam, bireýge baryp, qujat jasatý týraly ótinish aıtýǵa qoryqtym. Eger kómek surap barsam, meni shekara asyryp jiberedi dep oıladym. Meniń Reseıde barar jerim, jaqynym joq», - dedi Qalamqas Týraǵazına.
Onyń aıtýynsha, balalardyń bári mektep bitirip, er jetken soń ózderi baryp, ýaqytsha qujat jasatyp aldy. Tek naýqas balasy men ózi eshqaıda shyǵa almaı otyr.
«Reseıdiń Orynbor oblysy, Kývandyq aýdany, Oral aýylynan 1999 jyly keldik. Sol kezde Qarǵaly aýdanynyń Bolshevık aýlyna kelip, mektep bitirdik. Ózim 11 synyptan soń turmysqa shyǵyp, qujat rásimdeý úshin Reseıge bardym. Qazaqstanda turaqty turýǵa ruqsat beretin qujatty 2007 jyly aldym. Qazir úsh balam bar. Reseı qujatymen júrmin. Bes jyl saıyn ýaqytyn sozdyryp júrmin», - Qalamqas Týraǵazınanyń qyzy Álııa Svaıkýlova.
Qalamqas Týraǵazınanyń taǵy bir qyzy qaıtys bolǵan. Qazir bir qyzy turmysta, qujatyn ózi jasatty. Al kenjesi epılepsııa dertine shaldyǵyp, qajetti emdi tegin ala almaı otyr. Sebebi, onyń esh qujaty joq.
Búgin bul otbasy kóshi-qon qyzmetine baryp, qujat daıyndaýdyń joldaryn bildi.
«Qalamqas Týraǵazına bizge 2008 jyly turaqty turýǵa keldi. Ol Qarǵaly aýdanyna tirkeýge turdy. Belgisiz bir sebeptermen Qazaqstanda turaqty turýǵa ruqsat beretin qujatty rásimdemegen. Qazir qujattaryn tekserip, turǵylyqty mekenjaıǵa tirkeýi men Reseıdiń pasporty baryn kórip otyrmyz. Endi Qazaqstanda turǵylyqty jeri bar shetel azamatynyń qujatyn daıyndaý qajet bolyp tur. Sol qujat bolsa azamattyq alýǵa ótinish jasaı alady. Qalamqas Týraǵazına Reseı azamaty bolǵan soń qujat daıyndaý qysqartylǵan tártipti ótedi. Bar bolǵany 3 aıda azamattyq beriledi. Qazir Qarǵaly aýdandyq kóshi-qon qyzmetine baryp, Qazaqstanda turaqty turýǵa ruqsat beretin qujatty alady. Keıin Oral qalasyndaǵy elshilikke baryp, Reseı azamattyǵynan shyǵýǵa aryz jazady. Aryzdan keıin anyqtama qujaty beriledi. Sol anyqtamamen Qarǵaly aýdandyq kóshi-qon qyzmetine baryp, azamattyq alýǵa ótinish jazady. Qujatty der kezinde rásimdemegeni úshin 10 AEK kóleminde aıyppul tóleıdi»,- dedi Aqtóbe oblystyq polıtsııa departamenti kóshi-qon qyzmetiniń ınspektory Aıgerim Kartova.
Aıta keteıik, áleýmettik jaǵdaıy tómen otbasy Qazaqstan men Reseı arasynda júrip, qujat rásimdeýge qınalady. Olar qujaty bolmaǵan soń turaqty jumysqa tura almaıdy. Jaldamaly qyzmettegi balalary ákimshilik aıyppul men qujat rásimdeýge arnalǵan qarjyny taba almaı otyr.
