Aqtóbelik 100 talapker elimizdiń úzdik oqý oryndarynda tegin bilim alady
Aqtóbe oblysyna qajetti mamandar jergilikti bıýdjet esebinen oqytylady. Bilim alǵan jas mamandar keıin belgilengen orynda eńbek etýge mindetti. Bıyl óńirde 28 mamandyq arnaıy irikteldi. Medıtsına, din, kólik-logıstıka, dızaın, pedagogıka, aýyl sharýashylyǵy salasyna 100 grant berildi.
«Aqtóbe oblysy ákimdiginiń konkýrstyq komıssııasy óńirge ár saladan qajetti 28 mamandyqty tańdap aldy. Memlekettik tapsyrys negizinde jergilikti bıýdjetten bólinetin grant sany - 100. 2018 - 2019 oqý jyldaryna osy suranysqa ıe mamandyqtar boıynsha bilim granttaryn júzege asyratyn joǵary jáne joǵary oqý ornynan keıingi oqý oryndary anyqtaldy. Jergilikti bıýdjet qarajaty esebinen bilim berý grantyn alýǵa arnalǵan konkýrsqa qatysý úshin ótinishter 5 - 10 tamyz aralyǵynda joǵary oqý oryndarynyń qabyldaý komıssııasynda qabyldanady»,- dedi Aqtóbe oblystyq bilim basqarmasy basshysynyń orynbasary Gúlnaz Súleımenova.
Aıta keteıik, memlkettik grant boıynsha úsh talapker «Nur Múbárak» Egıpet ıslam mádenıet ýnıversıtetinde ıslamtaný, dintaný mamandyqtaryn meńgeredi. Sonymen qatar, tizimde Q.Jubanov atyndaǵy Aqtóbe óńirlik memlekettik ýnıversıteti, M.Ospanov atyndaǵy Batys Qazaqstan memlekettik medıtsınalyq ýnıversıteti men Jáńgir han atyndaǵy Batys Qazaqstan agrarlyq-tehnıkalyq ýnıversıteti bar. Ári Qurmanǵazy atyndaǵy ulttyq konservatorııada dástúrli mýzyka, dırejerleý mamandyǵyna, M.Tynyshpaev atyndaǵy qazaq kólik jáne kommýnıkatsııalar akademııasynda logıstıka men standarttaý jáne sertıfıkattaý mamandyqtaryna grant bólinip otyr.