Aqtóbegi halyqaralyq áýejaıda «Ashyq» qosymshasy iske qosyldy
Á. Moldaǵulova atyndaǵy Aqtóbe áýejaıyna tek «Ashyq» qosymshasy arqylý kirýge bolady. Ázirge ol testilik rejıminde jumys isteıdi.
QR Bas sanıtar dárigeriniń qaýlysyna sáıkes, áýejaı bir aptadan keıin jobanyń tolyqqandy qatysýshysy bolady. Termınalǵa kirý tek «jasyl» nemese «kók» mártebesi bar adamdarǵa ruqsat etiledi. «Qyzyl» mártebesi anyqtalǵan adamdar úshin arnaıy bólme qarastyrylǵan. Nysanda dáriger jumys isteıdi.
«Áýejaı termınaldarynyń kireberisterinde QR-kody bar taqtaıshalar ornatyldy. Árbir kelýshi ony skanerlep, tekserýshige usynýy kerek. Baǵdarlama óz kezeginde qyzyl, sary, kók jáne jasyl mártebege bólinedi. Biz áýejaı ákimshiligimen birge tolyq túsindirý jumystaryn júrgizdik jáne algorıtmderdi pysyqtaýǵa kómektestik. Kezek bolmas úshin «Ashyq» qosymshasyn aldyn ala júktep alýǵa keńes beremiz», - dedi Aqtóbe oblystyq kásipkerler palatasy dırektorynyń orynbasary Rýslan Kýıshınov.
