Aqtóbege sybaılas jemqorlardyń qarajatynan qurylǵan qordan qarjy tartylady

AQTÓBE. QazAqparat – Aqtóbede Premer-Mınıstr Álıhan Smaıylovtyń tóraǵalyǵymen ótken keńeste Aqtóbe oblysynyń áleýmettik-ekonomıkalyq damýynyń ózekti máseleleri talqylandy, dep habarlaıdy QazAqparat Úkimettiń baspasóz qyzmetine silteme jasap.

Premer-Mınıstr qazirgi ýaqytta jalpy óńir boıynsha jergilikti jáne aýdandyq mańyzy bar joldardyń 30%-ǵa jýyǵynyń normatıvtik jaǵdaıy óte nashar ekenin atap ótti. Óńirde úlestik qurylystyń sheshilmegen máseleleri bar. Al júıeli sharalar men jaǵdaıdy durys boljaý tásilderiniń bolmaýyna baılanysty oblystyń jekelegen aýdandaryn ár jyl saıyn kóktemde sý basyp qalady. Premer-Mınıstr sheshimin tappaǵan birqatar áleýmettik máselege de nazar aýdardy

13 myńnan astam bala 101 beıimdelgen mektepte bilim alyp otyr. 5 apattyq jaǵdaıdaǵy, 24 saman-kirpishten jáne 13 aǵashtan salynǵan mektep jumys isteıdi. Oqýshy oryndarynyń tapshylyǵy 17 myńnan astam.

64 medıtsınalyq mekeme tozyǵy jetken jáne beıimdelgen ǵımarattarda ornalasqan.

«Qazir osy túıtkildi máselelerdi sheshýge baǵyttalǵan «Jaıly mektep» jáne «Aýyldyq densaýlyq saqtaýdy jańǵyrtý» ulttyq jobalary iske asyrylyp jatyr. Sybaılas jemqorlardyń qarajaty esebinen qurylǵan bıýdjetten tys qordan qarjy tartylady. Osyǵan oraı, ákimdik jumysty kúsheıtip, jańa áleýmettik nysandardy belgilengen merzimde tapsyrýdy qamtamasyz etýi qajet», - dedi Álıhan Smaıylov.

Premer-Mınıstr atap ótkendeı, jergilikti turǵyndardyń turmys jaǵdaıyn jaqsartýdyń taǵy bir mańyzdy baǵyty – turaqty jumyspen qamtamasyz etý jáne olardyń tabysyn arttyrý.

Buǵan qazirgi naqty jaǵdaıdy eskere otyryp qabyldanǵan Halyqtyń tabysyn arttyrý baǵdarlamasy aıtarlyqtaı yqpal etetin bolady.

Keńes barysynda Álıhan Smaıylov ishki naryqty otandyq taýarlarmen tolyqtyrý esebinen azyq-túlik baǵasyn turaqtandyrý jáne jeńildetilgen shaǵyn nesıe berý arqyly aýyl turǵyndarynyń tabysyn arttyrýǵa baǵyttalǵan «Aýyl amanaty» baǵdarlamasyn tabysty iske asyrý máselelerine de toqtaldy.