Aqtóbege shuǵyl qonǵan Boeing-777 ushaǵynyń jolaýshysy ushý kezinde kóz jumǵan

AQTÓBE. KAZINFORM — Ekaterınbýrg — Sochı baǵytynda ushqan Boeing-777 ushaǵynyń jolaýshysy áýede ózin jaısyz sezinip, sol jerde kóz jumǵan. Onyń 42 jastaǵy áıel ekeni belgili boldy.

Álııa Moldaǵulova halyqaralyq áýejaıy resmı paraqsha arqyly qaza bolǵan jolaýshynyń týystary men jaqyndaryna kóńil aıtty. 

— Ushaq jerge qonǵan kezde shuǵyl áreket etý qyzmeti men jedel járdem brıgadasy jetti. Ókinishke qaraı jolaýshyny aman alyp qalý múmkin bolmady. 1983 jyly týǵan jolaýshy ushaq Aqtóbe áýejaıyna qonbaı turyp kóz jumǵan. Aqtóbe halyqaralyq áýejaıy jolaýshynyń týystary men jaqyndaryna kóńil aıtady. Jerdegi qyzmetpen baılanysqa shyǵyp, birge jumys istegen áýe kemesiniń ekıpajyna alǵysymyzdy aıtamyz, — dep habarlady Álııa Moldaǵulova halyqaralyq áýejaıy.

Eske salsaq, Nordwind Airlines áýekompanııasynyń Boeing-777 ushaǵy shuǵyl qondy. Jolaýshynyń biri ózin jaısyz sezinip, keıin onyń kóz jumǵany belgili boldy. Ushaqtan ózge jolaýshylar shyǵarylmaǵan.