Aqtóbege Reseı men Ózbekstannan gýmanıtarlyq kómek jetti
AQTÓBE. QazAqparat - Búgin Aqtóbe oblysyna Ózbekstannan gýmanıtarlyq kómek keldi. Taýardy «COVID 19» monıtorıng toby qabyldap aldy, dep habarlaıdy QazAqparat tilshisi.
«COVID 19» monıtorıng toby elimizdegi Aqparat jáne qoǵamdyq damý mınıstri jáne Densaýlyq saqtaý mınıstri arasyndaǵy memorandým aıasynda qurylǵan bolatyn. Belsendiler gýmanıtarlyq kómekti aýrýhana, dárihana, dárigerlerge bólip, dárihanadaǵy baǵany baqylaýǵa qatysady. Ózbekstannan jetkizilgen gýmanıtarlyq kómek arasynda 500 myń qolǵap pen 480 myń dana maska bar. Ony
«Antıkor ortalyǵynyń» ókilderi, eriktiler kútip aldy. Aldymen Salaýatty ómir saltyn qalyptastyrý ortalyǵyna ákelinip, odan soń aýrýhanalarǵa taratylady.
«Aqtóbege Reseıden de gýmanıtarlyq kómek keldi. Onda 90 myń qorǵanysh kostıými, 10 myń maska, 920 dana vırýsqa qarsy «Koronavır» preparaty bar. Júk «Shaǵala» shıpajaıyndaǵy provızorlyq ortalyqqa jetkizildi. Odan ári ózge aýrýhanalar men aýdandarǵa taratylady. Eriktiler ár dáriniń dittegen jerine jetýin qamtamasyz etedi», - dep habarlady «COVID 19 qoǵamdyq baqylaý» tobynyń múshesi Rafık Taztdınov.
