Aqtóbege Polshadan charterlik reıspen kelgen stýdentterden koronavırýs anyqtalmady
AQTÓBE. QazAqparat – Aqtóbe qalasyna Polshadan 100-den astam stýdent keldi. Olar elimizdiń ár óńiriniń týmasy, dep habarlaıdy QazAqparat tilshisi.
Aqtóbe qalasy boıynsha 11 adamnan koronavırýs ınfektsııasy anyqtalǵan bolatyn. Onyń tórteýi buryn indetke shaldyqqandardan vırýs juqtyryp alǵan. Qazirgi ýaqytta bir adam emdelip shyqty. Al 8 adamnyń jaǵdaıy qanaǵattanarlyq, ekeýiniń jaǵdaıy ortasha aýyr.
Oblystyq densaýlyq saqtaý basqarmasynyń basshysy Áset Qalıevtiń aıtýynsha, osy aptada taǵy birneshe adam aýrýhanadan shyǵarylýy múmkin.
«Charterlik reıspen Eýropadan stýdentter keldi. 116 stýdentten analız alyndy, eshkimnen vırýs anyqtalmady. Bul qýanyshty jaǵdaı. Tek aqtóbelik emes, ózge óńirdiń jastary da bar. Biz baqylaýdy ári qaraı jalǵastyramyz», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
Qazir stýdentter M.Ospanov atyndaǵy BQMMÝ jataqhanasynda jatyr.
«Elimizdiń ózge óńiriniń jastary aýylyna ketedi. Nur – Sultan, Qyzylorda, Atyraý, Batys Qazaqstan oblystarynan kólik keledi. Al aqtóbelik jastar erteń úılerine jiberilip, 14 kún baqylaýda bolady», - dedi oblystyq densaýlyq saqtaý basqarmasynyń basshysy Áset Qalıev.
Aıta keteıik, qazirgi tańda úıdegi karantınde 1835 adam bar. Olardy dárigerler baqylap otyr.
«Qaýip seıilgen joq. Sondyqtan karantındegi adamdardyń bári únemi baqylaýda bolady», - dedi oblystyq densaýlyq saqtaý basqarmasynyń basshysy Áset Qalıev.
Aqtóbe oblysy boıynsha qazir 120 jasandy tynys alý apparaty bar. Jergilikti bıýdjetten qarjy bólinip, 20 apparatqa tapsyrys berildi.
