Aqtóbege Mańǵystaýdan qutqarý jasaǵy jetti

AQTÓBE. KAZINFORM - Aqtóbe oblysyna Mańǵystaýdan 52 adam, 5 tehnıka men 8 motopompa jiberildi. Qazir aýdandarda jaǵdaı qalypty, degenmen sınoptıkter búgin jańbyr jaýady dep eskertti.

Aqtóbe oblystyq TJD baspasóz qyzmetiniń habarlaýynsha, óńirge TJM vıtse-mınıstri Erlan Nurpeıisov keldi. Ol Temir aýdanyndaǵy jaǵdaıdy baqylaýǵa bardy.

- Mańǵystaý oblysynan arlyǵy 52 adamnan turatyn qutqarý jasaǵy, 5 birlik tehnıka, 8 motopompa oblysqa jiberildi. Olar avarııalyq-qutqarý jumystaryna jumyldyrylady. Tótenshe jaǵdaılar mınıstrliginiń 20982 áskerı bóliminen 50 áskerı qyzmetker men 4 birlik tehnıka Temir aýdany Shubarqudyq eldimekenine jetti, - dep habarlady Aqtóbe oblysy TJD baspasóz qyzmeti. 

Temir aýdany Shubarqudyq aýylynda 5 úıge, 25 aýlaǵa sý kirgen. Munda sýdy aǵyzý úshin jol jyryldy. Al Baıǵanın aýdanynda jaǵdaı turaqtaldy. Biraq búgin jańbyr jaýýy yqtımal. 

- Baıǵanın aýdany boıynsha jaǵdaı qalypty. Sýdyń deńgeıi qaıtty. Keshe respýblıkalyq «Aqtóbe-Atyraý-Astrahan» jolynyń sý ótkizgishteri arqyly dalanyń sýy Qaraýylkeldi aýylyna ótip, 9 aýlaǵa sý kirdi. Úılerge qaýip joq, arnaıy jumys tobymen birge túnde ózim barlyq úıdi aralap shyqtym. Saǵyz ózeniniń deńgeıi taǵy da 1 metrge jýyq kóterilgen, - dedi Baıǵanın aýdanynyń ákimi Aıbek Kópenov. 

Aıta keteıik, keshe Aqtóbe oblysynyń birneshe aýdanynda qar sýy aýylǵa kirip, turǵyndardy ábigerge saldy.