Aqtóbege kiretin 24 shaqyrym jolǵa 693 jaryq shamy ornatyldy

AQTÓBE. KAZINFORM – Aqtóbede qalaǵa kireberis eki negizgi baǵyt – Bogoslov tas joly men Qobda aýdany jaǵynan kiretin joldy jaryqtandyrý jumystary aıaqtaldy. Jalpy uzyndyǵy 24 shaqyrym bolatyn jol ýchaskelerine 693 jaryq shamy ornatyldy.

s
Foto: Aqtóbe qalasy ákimdiginiń baspasóz qyzmeti

Qala ákimi Azamat Beket atqarylǵan jumystardyń nátıjesimen tanysyp, syrtqy jaryqtandyrý júıesin iske qosý rásimine qatysty.

Bogoslov tas joly – Aqtóbege kiretin negizgi baǵyttardyń biri. Jaryqtandyrylǵan ýchaskeniń uzyndyǵy 13,5 shaqyrymdy quraıdy. Jol boıynda Sazdy, Baýyrlastar, Kókjıde, Baıqadam jáne basqa da segiz eldi meken ornalasqan.

Bul baǵytta kólik qozǵalysy qarqyndy. Buǵan deıin turǵyndar tas joldyń qarańǵylyǵyna baılanysty másele kóterip kelgen.

a
Foto: Aqtóbe qalasy ákimdiginiń baspasóz qyzmeti

Joba aıasynda 389 jaryq baǵany ornatylyp, eki keshendi transformatorlyq qosalqy stantsııa salyndy. Qala ákimine atqarylǵan jumystar týraly merdiger «Inter elektro komplekt» JShS basshysy Aleksandr Grabov baıandady. Budan keıin jol boıyndaǵy jaryq shamdary iske qosyldy.

Qobda aýdany baǵytynan qalaǵa kiretin joldyń uzyndyǵy 10,5 shaqyrymdy quraıdy. Onyń boıynda Qurashasaı, Qanaǵat, Jańaqonys, Turan, Sulýtór, Arman jáne basqa da jeti eldi meken ornalasqan.

Bul baǵytta da kólik qozǵalysy qarqyndy. Turǵyndar joldy jaryqtandyrý máselesin birneshe jyldan beri kóterip kelgen.

Atalǵan ýchaskede 304 jaryq baǵany ornatylyp, tórt transformatorlyq qosalqy stantsııa salyndy. Qurylys-montaj jumystaryn «Ótes Aqtóbe» JShS júrgizdi.

Kompanııa basshysy Berdııar Pirimbetovtiń aıtýynsha, joba kelesi jyly aıaqtalýy tıis bolǵan. Alaıda qala ákiminiń tapsyrmasymen jumystar merziminen buryn aıaqtaldy.

p
Foto: Aqtóbe qalasy ákimdiginiń baspasóz qyzmeti

– Bul eki ýchaskeni de qalanyń kireberis qaqpalarynyń biri deýge bolady. Jol boıynda 15 eldi meken ornalasqan, onda halyq tyǵyz qonystanǵan. Sonymen qatar, kólik qozǵalysy da qarqyndy. Sondyqtan jaryqtandyrý júrgizýshiler men jaıaý júrginshilerdiń qaýipsizdigi úshin óte mańyzdy. Jumystyń sapasyna erekshe mán berip, merdiger uıymdardan jaryq berý qýaty joǵary Philips markaly shamdardy ornatýdy talap ettik. Bul baǵyttaǵy jumystar jalǵasyn tabady. Qalaǵa kiretin uzyn joldardyń barlyǵy kezeń-kezeńimen jaryqtandyrylady, – dedi Azamat Beket.

Syrtqy jaryqtandyrý júıesiniń turaqty jumysyn qamtamasyz etý úshin eki ýchaskede de elektr jelileri tartylyp, transformatorlyq qosalqy stantsııalar ornatyldy.

Atap aıtqanda, Qobda baǵytyndaǵy jolda jer astymen 7,2 shaqyrym AZB kabeli jáne 10,2 shaqyrym ózdiginen oqshaýlanǵan SIP kabeli tartyldy.

Jańa jaryqtandyrý júıesin jaqyn mańdaǵy eldi meken turǵyndary da qýanyshpen qabyldady.

r
Foto: Aqtóbe qalasy ákimdiginiń baspasóz qyzmeti

– Men Qurashasaı turǵyn alabynda 10 jyldan astam ýaqyt turamyn. Buryn joldyń boıy óte qarańǵy edi. Qazir aýyldyń irgesine deıin jap-jaryq bolyp tur. Qýanyshymyzda shek joq. Atqarylǵan jumysqa alǵysymyzdy bildiremiz, – dedi Qurashasaı turǵyny Jańbyrbaı Jıenqulov.

Osylaısha, eki jobanyń júzege asýy nátıjesinde Aqtóbege kireberis baǵyttardaǵy 24 shaqyrym jol jaryqtandyryldy. Bul kólik júrgizýshileri men jaıaý júrginshilerdiń, ásirese, túngi ýaqytta qaýipsiz ári qolaıly qozǵalýyna múmkindik beredi.

Aıta keteıik, buǵan deıin Aqtóbede jaıaý júrginshilerdiń qaýipsizdigin arttyrý maqsatynda «aqyldy» ótkel tájirıbelik paıdalanýǵa berilgen bolatyn. Júıe adam ótkelge jaqyndaǵan kezde avtomatty túrde qosymsha jaryqtandyrýdy iske qosyp, júrgizýshilerge eskertý beredi.