Aqtóbege qosymsha 20 myń doza vaktsına jetkizildi
AQTÓBE. QazAqparat – Aqtóbe oblysy boıynsha 10 myńǵa jýyq adam vaktsına qabyldady. Óńirge taǵy 20 myń doza jetkizildi, dep habarlaıdy QazAqparat tilshisi.
Ótken táýlikte oblys boıynsha taǵy 116 adamnan koronavırýs ınfektsııasy anyqtaldy. Búginge deıin barlyǵy 6236 jaǵdaı tirkelse, onyń 77 paıyzdan astamy jazyldy.
«Qazir 562 adam ınfektsııalyq statsıonarlarda em alyp jatyr. Onyń 395-i Aqtóbe qalasynda. 35 naýqas jansaqtaý bóliminde. Tórteýi ókpeni jasandy jeldetý apparatyna qosylǵan. Vırýstan saqtanýdyń eń tıimdi joly – vaktsına. Qazirgi kezde 10 myńnan astam adam ekpe qabyldap úlgerdi. Taǵy 20 myń doza jetkizildi. Turǵyndar meken jaıy boıynsha emhanaǵa kelip, vaktsına qabyldaı alady», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.
Qazirgi kezde úı karantınine jiberilgender sany artyp barady. 3300-den astam adam eki apta boıy dárigerler baqylaýynda bolýy tıis.
«Monıtorıng toptardan jáne jergilikti polıtsııa qyzmetinen túsken materıaldarǵa sáıkes 176 aıyppul salyndy. Aıyppul kólemi – 24,5 mıllıon teńge. Úılestirý ortalyǵynan túsken habarlama negizinde taǵy 21 tekserý júrgilizip, 2 mıllıon teńgeden astam aıyppul salyndy. «Qyzyl» aımaqtaǵy óńir turǵyndaryn sanıtarııalyq talapty saqtaýǵa shaqyramyz. Ramazan aıynda musylmandarǵa bir aı boıy oraza ustaý paryz etilgen. Degenmen toptalyp, aýyzasharǵa barýǵa nemese úıine syrttan adam shaqyrýǵa bolmaıtynyn eskertemiz. Árkim óz shańyraǵynda, otbasy múshelerimen birge bolǵany durys. Sondaı-aq, indetke baılanysty bıyl meshitterde taraýıh namazy oqylmaıdy», - dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.
