Aqtóbege et klasterin damytýdy úırený úshin búkil Qazaqstannan sharýalar keldi
ASTANA. QazAqparat - Aqtóbe oblysyna jumys saparymen QR Premer-Mınıstriniń orynbasary, Aýyl sharýashylyǵy mınıstri Ómirzaq Shókeev keldi. Onymen birge óńirge oblys ákimderiniń orynbasarlary, eldegi iri aýyl sharýashylyǵy qurylymdary men kásiporyndardyń basshylary da keldi, dep habarlaıdy QazAqparat Aqtóbe oblysy ákimdiginiń baspasóz qyzmetine ilteme jasap.
Sapardyń negizgi maqsaty - «Aktep» JShS negizinde qurylǵan Aqtóbe et klasteriniń is tájirıbesimen tanysý. Kásiporyn 2012 jyldan beri jumys jasap keledi, 11 myń bas iri qara maldy bordaqylaıtyn alańy men qýattylyǵy jylyna 7200 tonnadan asatyn et óńdeý kesheni bar. Búginde klaster barlyq oblystyń 350 sharýa qojalyǵymen seriktes. Mundaı áriptestik «Aktep» JShS-men qatar qarapaıym sharýalar úshin de tıimdi.
Aqtóbe et klasteriniń sondaı seriktesteriniń biri -«Qyzyljar» ShQ.
«Biz «Aktep» JShS-men 2012 jyldan beri birge qyzmet istep kelemiz. Osy ýaqyttyń ishinde 3000 tonna shóp, 200-den astam iri qara mal basyn jetkizdik. Sońǵy jyldary asyl tuqymdy maldy jaldaýdyń, aýyl sharýashylyǵy tehnıkasyn jalǵa berýdiń jańa pılottyq jobalary engizilip jatyr. Biz maldy semirtýge alamyz, ony ósirip, sol úshin aqsha alamyz. Basqa baǵdarlama - maldy jaldaý. Ol boıynsha biz asyl tuqymdy maldy bes jylǵa jalǵa alamyz, tólimen. Bul baǵdarlamalar bizge qyrýar qarjy tartpaı-aq, tabysty keńeıip, urǵashy mal basyn tolyqtyrýǵa jáne maldyń tuqymyn jaqsartýǵa múmkindik beredi. Bul shaǵyn sharýashylyqtar úshin óte tıimdi»,-dedi sharýa qojalyǵynyń basshysy A.Balmanov.
«Bizdiń sharýa qojalyq mal sharýashylyǵymen aınalysady. Óz ónimderimizdi tirideı salmaqta «Aktep» JShS-ne tapsyramyz, atalmysh kásiporynnyń bordaqylaý alańyna biz sondaı-aq, ózimiz daıyndaǵan mal azyǵynyń artyǵyn da jetkizemiz. Tez, kezeksiz ári jaqsy baǵamen qabyldaıdy. Aqsha az ýaqyt ishinde banktegi esepshotqa túsedi. Buryn biz ózimiz bazarǵa baryp, satyp alýshylardy izdeımiz de alypsatarlarǵa arzanǵa satatynbyz. Búginde bul másele tolyǵymen sheshildi. Biz asyl tuqymdy mal basyn damytýda da áriptestik jasaımyz: «Aktepten» Aberdın-Angýs óndirýshileriniń buqalaryn jalǵa alamyz. Osy tuqymnyń tóli 10-11 aıynda 350-400 keli bolady»,- dedi «Qarshyǵa» ShQ basshysy A.Jetenov.
Aýyl sharýashylyǵy mınıstrliginiń basshysy Aqtóbe et klasteriniń joǵary tıimdiligin atap ótti.
«Meniń oıymsha, biz ekonomıkalyq nátıjege sharýalar «Aktep» JShS-ny mysalǵa alyp, klasterlerge birikken kezde, gorızontaldi kooperatsııa esebinen qol jetkizemiz. Biz «Aktepke» kómektese otyryp, olarmen jumys jasaıtyn usaq sharýashylyqtaryna da járdem beremiz. Menińshe, bizdiń osy jolmen júrgenimiz durys»,-dep túıindedi Ó.Shókeev.
