Aqtóbege EQYU-nyń baıqaýshylary keldi

AQTÓBE. QazAqparat - Aqtóbege Eýropadaǵy qaýipsizdik jáne yntymaqtastyq uıymynyń halyqaralyq baıqaýshylary Aleksandra Paıevıch pen Valentın Voronkov keldi. Olarmen óńir basshysy Ońdasyn Orazalın kezdesti, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Halyqaralyq baıqaýshylar QR Parlamenti Májilisi men máslıhattary depýtattarynyń saılaýyn baqylaıdy. Ońdasyn Orazalın kezdesý barysynda saılaýdyń tııanaqty, sapaly uıymdastyrylýyn qamtamasyz etý maqsatynda daıyndyqtyń qyzý júrgizilip jatqandyǵyn jetkizdi.
«Bizdiń tarapymyzdan saılaýdyń ádil ótýi, ashyqtyq birinshi orynǵa qoıylady. Aldaǵy saılaý óz konstıtýtsııalyq merziminde ótkiziledi. Bul saılaýdyń ereksheligi – partııalyq tizimge daýys beriledi. Sondyqtan bizdiń mindetimiz – saılaýǵa qatysýshy barlyq partııaǵa birdeı jaǵdaı jasaý. Ol úshin biz materıaldyq - uıymdastyrýshylyq sharalardy jan-jaqty qolǵa aldyq. Sonymen birge oblystaǵy azamattyq qoǵam ókilderi daýys berý barysynda baıqaýshy bolýǵa nıet bildirgenin atap ótkim keledi. Partııalyq emes baqylaý ortalyǵynyń oblystyq shtaby quryldy. Bul azamattyq qoǵam baıqaýshylarynyń jumysyn júıelep, úılestiretin bolady», - dep atap ótti oblys ákimi.

Aleksandra Paıevıch pen Valentın Voronkov óz kezeginde aldaǵy jaýapty sharaǵa óńirdiń daıyndyǵyn joǵary baǵalady.