Aqtóbege birneshe óńirden gýmanıtarlyq kómek jetkizildi
AQTÓBE. KAZINFORM – Aqtóbege Mańǵystaý, Atyraý, Túrkistan, Qyzylorda oblystary men Almatydan gýmanıtarlyq kómek kelip jatyr. Qazir evakýatsııalyq pýnktterdegi adamdardan shatyr, qap, motorly qaıyq, generatorǵa suranys bar.
Aqtóbe oblysynda gýmanıtarlyq kómek jınaý jumysy 28-naýryz kúni bastaldy. Qaladaǵy «Anaǵa taǵzym» ortalyǵy men jastar resýrstyq ortalyǵynyń ǵımaraty kómek jınaý ornyna aınaldy. Munda búginge deıin Mańǵystaý, Atyraý, Túrkistan oblystarynan, Almaty qalasynan jáne Qyzylorda oblysy Qarmaqshy aýdanynan kómek jetkizildi. Sonymen birge oblys turǵyndary azyq-túlik pen kıim-keshek, tósek-oryndy, gıgıenalyq zattardy tasydy. Olardy kólikten ortalyqqa, odan qaıta kólikke tıeý qyzmetin eriktiler atqarady.
- Ár aýdannan suranys qabyldanady. Suranys negizinde jastar suryptap, daıyndap beredi. Keıin kólik júrgizýshiler chatyna shyǵyp, júkti jetkizý ornyn aıtamyz. Olar kez kelgen aýdan, aýylǵa júk kóligimen jetkizip berip jatyr. Bári tegin. Búginnen bastap Aqtóbe qalasy Almaty aýdany ákimdiginde úshinshi gýmanıtarlyq kómek orny ashyldy. Onda qala turǵyndaryna qajetti zattar jetkiziledi. Sebebi munda adamdar jeke kelip, kómek surap turady. Al aýqymdy júk jetkizilip, tasymaldanyp jatqanda bir adamǵa kómek berý qıyndap ketedi. Endi «Anaǵa taǵzym» ortalyǵynan tek aýdandarǵa jiberiledi, - dedi Aqtóbe oblysy ákimi apparaty basshysynyń orynbasary Lázzat Orazbaeva.
Qazir Aqtóbe oblysy boıynsha azyq-túlik, kıim-keshek, gıgıenalyq zattar jetkilikti. Endi shatyr, qum toltyratyn qap, motorly qaıyq, generatorǵa suranys bar.
- Qazir bizde kásipkerler zattaı da, qarjylaı da kómek kórsetip jatyr. Almatydan kelgen júkte 20 generator, 6 motopompa, 10 úrmeli qaıyq, 50 sý etigi, jaryq túsirgen qural bar. Bul 9 mln teńgeniń taýary. Sonymen birge qarapaıym turǵyndar da qolynda baryn berdi. Barlyǵy 20 úlken júk kóligimen taýar kelip, úlestirildi. Jumysty negizinen jastar atqaryp jatyr. Táýlik boıy úzilissiz qyzmet kórsetip júrgen jastar keıde gýmanıtarlyq kómek ortalyǵynda qonyp qalady. Alǵashynda tósek-oryn dep jınaǵanmen, qazir munda bári bar, - dedi Lázzat Orazbaeva.
Aqtóbelik eriktiler arasynda jumysshylar, stýdentter men túrli sala mamandary da bar.
- Bastapqy kezde qaıyrymdylyq kómek dep jetkizilgen taýar sany kóp boldy. Alǵashqy bes kúnde Yrǵyz, Oıyl, Qobda aýdandaryna zat tıep berýge kómektestim. Keıingi úsh kúnde júk legi azaıǵanymen, jaýapkershilik tómendemedi. Bizge tizim beredi, sony suryptap daıyndaımyz, tıep jiberemiz, - dedi erikti Ernur Ulyqpanov.
