Aqtóbege Arystan 200 bala jazǵy lagerge keldi

AQTÓBE. QazAqparat - Aqtóbe qalasynyń jazǵy lageri Arystan kelgen 200 balany qabyldady, dep habarlaıdy QazAqparat tilshisi.

Arys balalary 15 shilde men 3 qyrkúıek aralyǵynda Aqtóbe qalasyndaǵy «Shuǵyla» balalardy saýyqtyrý lagerinde tynyǵady. Eki aýysymda ár bala 12 kún demalady.

«Balalar shyǵarmashylyqpen aınalysyp, sporttyq sharalarǵa, mýzykalyq, ıntellektýaldyq saıystarǵa qatysady.
Arystyq balalardyń demalysyn uıymdastyrýdyń basty maqsaty – tótenshe jaǵdaıdy umyttyrý ári psıhologııalyq kómek kórsetý. Lagerde balalardyń demalýyna barlyq jaǵdaı jasalǵan. Olardyń oınaýyna arnalǵan arnaıy alańdar, bólmeler jabdyqtalǵan, demalýshylar oıyn-saýyq quraldarymen tolyq qamtamasyz etilgen. Demalysty uıymdastyrý, onyń ishinde balalardy Túrkistan oblysynan lagerge deıin jetkizý jáne keri aparý, tamaqtaný, jatyn oryn shyǵyndary qabyldaýshy jaqtyń esebinen boldy. Oblystyq bilim basqarmasy balalardyń ómir qaýipsizdigin qamtamasyz etý úshin qajetti shara qabyldady», - dep habarlady oblystyq bilim basqarmasynyń baspasóz qyzmeti.
Aıta keteıik, balalar 6 mezgil tamaqtanady. Sozylmaly derti bar demalýshy balalarǵa qosymsha dıagnostıka jasalyp, em-dom jasalady. Sonymen qatar lager baǵdarlamasy boıynsha balalar úshin Aqtóbe qalasynyń kórikti jerlerimen tanysý, murajaı, mádenı oryndar jáne saıabaqtarǵa ekskýrsııa uıymdastyrylady.