Aqtóbege 800 mlrd teńgeden astam ınvestıtsııa: óńirde jańa shahtalar men zaýyttar salynady

ASTANA. KAZINFORM — Premer-mınıstr Oljas Bektenov Aqtóbe oblysyndaǵy iri ónerkásip oryndaryn aralap, ınvestıtsııalyq jobalardyń júzege asý barysymen tanysty. Óńirde jańa shahtalar, alıýmınıı óndirisi men energetıkalyq nysandardy qamtıtyn aýqymdy jobalar qolǵa alynbaq. Bul týraly Úkimet málim etti.

Aqtóbege 800 mlrd teńgeden astam ınvestıtsııa: óńirde jańa shahtalar men zaýyttar salynady
Foto: Úkimet

Premer-mınıstr Oljas Bektenov Aqtóbe oblysyna jumys sapary aıasynda óńirdiń ónerkásiptik áleýetimen, iri óndiris oryndardyń qyzmetimen jáne ınvestıtsııalyq jobalardyń júzege asyrylý barysymen tanysty. Ónerkásipti damytý jáne elimizdiń óndiristik áleýetin nyǵaıtý – Memleket basshysynyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda aıqyndalǵan basym baǵyttardyń biri.

Premer-mınıstr Hromtaý aýdanynda «Aqtóbe mys kompanııasy» JShS (Kóktaý aýyly) mys jáne mys-myrysh kenderin óndirý jáne baıytý kásipornyna, Eurasian Resources Group kompanııalar tobynyń (Hromtaý qalasy) kásipornyna bardy.

Aqtóbege 800 mlrd teńgeden astam ınvestıtsııa: óńirde jańa shahtalar men zaýyttar salynady
Foto: Úkimet

«Aqtóbe mys kompanııasy» JShS óndiristik alańynda Oljas Bektenov ken baıytý fabrıkasy men mys kontsentratyn óndiretin taý-ken baıytý kombınatynyń jumysymen tanysty. Kúrdeli kenderden mys pen myryshty paıdaly komponentterdiń joǵalýyn barynsha azaıta otyryp, tıimdi bólip alýǵa múmkindik beretin selektıvti jáne ujymdyq-selektıvti flotatsııa tehnologııalary kórsetildi. Kásiporynda óndiris ónimdiligi men qaýipsizdigin arttyrýǵa baǵyttalǵan «Flotatsııa operatorynyń tsıfrlyq kómekshisi» jáne taý-ken kóligin basqarýdyń avtomattandyrylǵan júıesi sekildi tsıfrlyq otandyq ázirlemelerde qoldanylady.

«Aqtóbe mys kompanııasy» JShS bas dırektory Farıt Sýfıanov zaýyttyń óndiristik qýaty jylyna 5 mln tonna kendi óńdeýge jetetinin aıtty. Kásiporyn óz jumysyn bastaǵaly beri óndiristi damytýǵa 407 mlrd teńge ınvestıtsııalanǵan, 2 myńnan astam jumys orny qurylǵan. Qazirgi ýaqytta seriktestik «Oktıabrge 50 jyl» jáne «Prıorskoe» ken oryndarynda jerasty kenishterin salý, sondaı-aq «Lımannoe» ken ornynda óndirý jumystaryn keńeıtý boıynsha jobalardy júzege asyrýda. Bul kásiporynnyń shıkizat bazasyn keńeıtýge jáne jańa jumys oryndaryn qurýǵa múmkindik beredi. Jańa jobalardy qosqanda ınvestıtsııalardyń jıyntyq kólemi eki esege artyp, 800 mlrd teńgeden asady.

Aqtóbege 800 mlrd teńgeden astam ınvestıtsııa: óńirde jańa shahtalar men zaýyttar salynady
Foto: Úkimet

«Qazhrom» TUK» AQ aýmaǵynda (ERG tobyna kiredi) Premer-mınıstr óndiristik kórsetkishtermen, ınvestıtsııalyq jobalardyń júzege asyrylý barysymen jáne ERG tobynyń Aqtóbe oblysyndaǵy kásiporyndaryn odan ári damytý josparlarymen tanysty. «Qazhrom» TUK» AQ bas dırektory Erjan Abdýlabekov tórt negizgi baǵytty qamtıtyn, jalpy ınvestıtsııa kólemi $3,4 mlrd bolatyn jańa ınvestıtsııalyq jobalar týraly habardar etti, olar: quny $1,3 mlrd bolatyn alıýmınıı klasterin qurý, $1 mlrd-qa jýyq qarajatqa energetıkany damytý, $800 mln-nan astam qarjyǵa «Bolashaq» shahtasynyń ekinshi jáne úshinshi kezekterin salý, sondaı-aq quny $300 mln bolatyn temir ken baıytý fabrıkasyn salý.

Alǵashqy nysandardy kelesi jyly paıdalanýǵa berý josparlanýda: qazirgi ýaqytta avtomobıldiń alıýmınıı dıskilerin shyǵarý zaýyty jobalanýda bolsa, odan bólek Aqtóbede kádege jaratý elektr stansasyn salý jáne gallıı óndirisin iske qosý jobalary júzege asyrylmaq. 2028 jyly Aqsý elektr stansasynyń №7 energoblogyn iske qosý jáne Pavlodar alıýmınıı zaýytyn jańǵyrtýdyń birinshi kezeńin aıaqtaý josparlanýda. 2029 jyly «Tassaı» jel elektr stansasyn, temir ken baıytý fabrıkasyn iske qosý, Pavlodar alıýmınıı zaýytyn jańǵyrtýdyń ekinshi kezeńin aıaqtaý jáne QEZ-2 jańa elektrolız zaýytyn salý kózdelgen. 2030 jyly Shymkent JEO-3-te gaz týrbınalyq qondyrmany iske qosý, 2034 jylǵa deıin «Bolashaq» shahtasynyń ekinshi jáne úshinshi kezeńderin tolyq júzege asyrý josparlanyp otyr.

Aqtóbe
Foto: Úkimet

Premer-mınıstrge 2027 jyldyń sońyna qaraı otandyq alıýmınııden jylyna 500 myńǵa deıin avtomobıl dıskilerin óndirý jónindegi josparlar týraly baıandaldy. Ónimder sonyń ishinde tıisti memorandýmdar jasalǵan Astana Motors jáne Hyundai avtoóndiristik kompanııalaryna baǵdarlanatyn bolady.

Oljas Bektenov óńirlerde ónerkásiptik negizdi damytýdyń mańyzdylyǵyn atap ótti.

— Memleket basshysy atap ótkendeı, saıyp kelgende, qýatty aımaqtar kúshti memlekettiń negizin qalaıdy. Osyǵan baılanysty aýmaqtardyń úılesimdi damýyn qamtamasyz etý, óńirlerdiń ınvestıtsııalyq tartymdylyǵyn arttyrý jáne olardyń ekonomıkalyq áleýetin nyǵaıtý máseleleri aıryqsha mańyzǵa ıe. Otandyq kásiporyndardy damytý, óndiristik qýattardy keńeıtý jáne qosylǵan quny joǵary ónimder shyǵarý úshin qolaıly jaǵdaı jasaýǵa basa mán berý qajet, — dep atap ótti Premer-mınıstr.

Nysandardy aralaý qorytyndysy boıynsha Premer-mınıstr kásiporyndardy odan ári tehnologııalyq jańǵyrtý men mıneraldyq shıkizatty óńdeýdi tereńdetýdi tapsyrdy. Іri kompanııalardyń satyp alýlaryndaǵy qazaqstandyq qamtý úlesin arttyrýǵa, otandyq óndirýshilermen sondaı-aq shaǵyn jáne orta bıznes sýbektilerimen yntymaqtastyqty keńeıtýge basa nazar aýdaryldy.

Eske sala keteıik, buǵan deıin Premer-mınıstr Oljas Bektenov Qazaqstanda óndiriletin qandaı da bir taýardy ımporttaý memleket múddesine qaıshy keletin áreket ekenin aıtqan edi.