Aqtóbege 5 myń doza Spýtnık laıt vaktsınasy jetkizildi

AQTÓBE. QazAqparat – Aqtóbege Spýtnık laıt vaktsınasy jetkizildi. Barlyǵy 5 myń doza revaktsınalaý kezinde qoldanylady, dep habarlaıdy QazAqparat tilshisi.

Aqtóbe oblysynda búginde 355 myńnan astam adam vaktsınanyń eki komponentin de qabyldady. Al 48 myńnan astamy revaktsınatsııadan ótti. Pfizer-di 9 myń adam saldyrǵan.

«Oblysqa 5 myń doza Spýtnık laıt vaktsınasy jetkizildi. Bári de revaktsınalaý kezinde qoldanylady. Qazirgi kezde emhanalarǵa taratý, jetkizý jumysy júrgizilip jatyr», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.

Aıta keteıik, oblysta koronavırýs ınfektsııasyna shaldyqqan 269 naýqas aýrýhanada em qabyldap jatyr. Onyń 15-i jansaqtaý bólimine tússe, ekeýi ókpeni jasandy jeldetý apparatyna qosylǵan. Aıtyp óteıik, sońǵy kezde vırýs bala men júkti áıel arasynan jıi anyqtalyp jatyr. Qazir dertke shaldyqqan 410 balanyń 34-i aýrýhanada. Sonymen birge 227 júkti áıeldiń 56-sy aýrýhanadaǵy dárigerler baqylaýyna alyndy. Báriniń jaǵdaıy ortasha aýyr.