Aqtóbege 150 jyl: Kásipker jerasty jolyn syıǵa tartty
Aqtóbeniń 150 jyldyǵy aıasynda aldymen saıası qaıratker Vasılıı Zınchenkonyń eskertkishi jańa orynǵa aýystyryldy. V.Zınchenko 1909 jyly Aqtóbege kelip, depýtattar keńesiniń alǵashqy tóraǵasy bolǵan edi. Ol Qazaqstan temirjolyn qalpyna keltirý, jańartý jumysyna úles qosyp, uzaq jyldar boıy kásipodaq salasyn basqardy. Keıin Aqtóbe qalasynyń mereıtoıyna kásipker tartý etken jerasty joly qoldanysqa berildi.
«Mádenı-buqaralyq sharalar josparlanǵanymen qalanyń órkendeýine aldymen turǵyndardyń ózderi úles qosady. Búgin kásipker Tólegen Tańatarov bastama kóterip, jerasty jolyn salyp berdi. Munda mektep ornasqan, demek qaýipsizdik úshin syı jasaldy. Igi ister kásipkerler úshin úlgi. Bul úrdis jalǵasady», - dedi oblys ákimi Ońdasyn Orazalın.
«TransMostGrýpp» JShS-i jerasty jolyn «Týǵan jerge taǵzym» aktsııasy aıasynda saldy. Qurylys jumystaryna 60 mıllıon teńge jumsalǵan. Ári munda qaýipsizdik úshin beınekameralar qondyrylatyn bolady.
Aıta keteıik, búgin «Qutty meken - Aqtóbe» atty merekelik kontsert ótedi. Al keshke «Aýyl - el besigi» atty estrada juldyzdarynyń baǵdarlamasy josparlanǵan.
Qalanyń 150 jyldyǵyna oraı óńirdegi 12 aýdan syı daıyndady. Aýdandar 8 saıabaq salyp, tórteýin jóndeýden ótkizedi. Qala ákiminiń baspasóz qyzmetiniń aıtýynsha, jóndeý jumystary 22 mamyr kúni bastalyp, 5 maýsymǵa deıin jalǵasady.
«Alǵa aýdany Máńgilik alaý mańyn qalpyna keltirýdi kóktemde bastady. Muǵaljar aýdany Jeńis dańǵylyndaǵy saıabaqty jóndeıdi. Hromtaý aýdany Ábilqaıyr han dańǵylyndaǵy saıabaqty retke keltirip, Áıteke bı, Qarǵaly, Yrǵyz, Oıyl, Temir, Mártók Eset batyr, Bókenbaı batyr kósheleri, Sáńkibaı batyr, Álııa Moldaǵulova dańǵyldaryn kógaldandyryp, abattandyrady. Qobda aýdany Edige batyrǵa eskertkish ornatyp, sol dańǵyldy jasap beredi», - dep habarlady baspasóz qyzmeti.
