Aqtóbeden túıe men qoı júni Mońǵolııaǵa eksporttalady
AQTÓBE. QazAqparat - Aqtóbelik kásipker qoı men túıe júnin qabyldap jatyr. Jospar boıynsha ol jylyna 200 tonna túıe, 500 tonna qoı júnin Mońǵolııaǵa eksporttaıdy, dep habarlaıdy QazAqparat tilshisi.
Aqtóbe sharýalary úshin taǵy bir máseleniń túıini sheshiledi. Qoı qyrqyp, júnin qaıda jibererin bilmeıtin sharýalar endi ár kelisin 50-60, al túıe júniniń kelisin 700-750 teńgege sata alady.
Aqtóbe oblysy ákiminiń orynbasary Mavr Abdýllınniń aıtýynsha, jergilikti kásipker júndi eksporttaýǵa sheshim qabyldap, Mońǵolııamen baınalys ornatty.
«Qazirgi kúni júndi jınaý bastaldy. Aldaǵy ýaqytta júndi eksportqa shyǵaramyn. Veterınarııalyq ınspektsııadan arnaıy ruqsat alyp, keler aptada jumystyń jańa satysyna shyǵamyz. Júndi Mońǵolııadaǵy jún óńdeý fabrıkasyna jiberemin. Kelisimshart jasalyp, jylyna 200 tonna túıe, 500 tonna qoı júni tasymaldanýǵa múmkindik aldyq»,- dedi kásipker Qaırat Quttymuratov.
Aıta keteıik, júndi temirjol arqyly tasý múmkin bolmady. Sebebi, fabrıka temirjol boıynda ornalaspaǵan. Eki el arasyndaǵy qashyqtyq 3 myń shaqyrymdy qurap otyr.
«Kólik arqyly tasymaldanǵan soń fabrıka jol shyǵynynyń jartysyn óteıtin boldy. Jún jýylmaıdy, tek nyǵyzdalady. Bul bastamasy ǵana. Alda jún kólemin kóbeıtý úshin Mańǵystaý, Atyraý, Qyzylorda oblystarynan qabyldaý beketin ashqym keledi»,- dedi kásipker.
