Aqtóbeden Reseıge jolaýshylar tasymaldaıtyn taksı aýdarylyp, 4 adam kóz jumdy
AQTÓBE. KAZINFORM — Aqtóbe-Orsk tasjolynda jeńil kólik aýdaryldy. Tórt jolaýshy kóz jumdy. Dál osy taksı qyzmetiniń júrgizýshisin birneshe saǵat buryn polıtsııa toqtatyp, jol erejesin saqtaý týraly eskertý bergeni anyqtalyp otyr.
Oqıǵa 5 maýsym kúni saǵat saǵat 15:00 shamasynda boldy. Aqtóbe-Orsk arasynda jolaýshylar tasymaldaıtyn Toyota Alphard kóliginiń júrgizýshisi Qarǵaly aýdany Aşylysaı aýyly mańynda aýdarylyp qaldy. Saldarynan tórt adam mert bolyp, bir adam aýrýhanaǵa tústi.
— Avtokólik júrgizýshisi Aqtóbe qalasynan Reseı Federatsııasynyń Orsk qalasyna jolaýshylar tasymaldaıdy. Ol bul qyzmetti resmı atqarady. Jol-kólik oqıǵasynan birneshe saǵat buryn polıtsııa qyzmetkerleri kólikti toqtatyp, jol-kólik oqıǵasynyń aldyn alý úshin túsindirme jumysyn júrgizdi. Biraq júrgizýshi polıtseılerdiń eskertýine elemegen. Jol-kólik oqıǵasy faktisi boıynsha sotqa deıingi tergep-tekserý júrgizilip jatyr. Polıtsııa departamenti jol qozǵalysynyń barlyq qatysýshylaryn jol erejelerin qatań saqtaýǵa shaqyrady, — dedi oblystyq PD baspasóz qyzmetiniń jetekshisi Erbolat Sarqulov.
Sonymen birge 5 maýsym kúni Samara — Shymkent tasjolynyń Áıteke bı aýdany Qııaqty aýyly mańynda eki kólik soqtyǵysyp, bir adam kóz jumdy. Qazir tórt adam túrli dene jaraqatymen aýrýhanada jatyr. Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, zardap shekkender Yrǵyz jáne Áıteke bı aýdandarynyń aýrýhanalaryna jetkizilgen. Olar bas-mı jaraqatyn alyp, qabyrǵasy synǵan. Jaǵdaılary aýyr, asa aýyr.
