Aqtóbedegi jylqyshylar qazasynan soń sharýashylyq ıesine qatysty qylmystyq is qozǵaldy
AQTÓBE. QazAqparat - Aqtóbe oblysy, Baıǵanın aýdanyndaǵy Laqtybaı aýylynda aqpan aıynda úsh jylqyshy qaza tapty. Úsheýi de oq jaraqatynan mert bolǵan.
Osy oqıǵaǵa qatysty oblystyq ishki ister departamenti beıbereket qarý saqtaǵan sharýashylyq ıesine qatysty qylmystyq is qozǵalǵanyn málimdedi, dep habarlaıdy QazAqparat tilshisi.
«Aqpan aıynda Baıǵanın aýdanynyń Qyzylbulaq aýylynda úsh jylqyshynyń máıiti tabylǵan bolatyn. Osy oqıǵaǵa baılanysty beıbereket qarý saqtaǵan sharýashylyq ıesi qylmystyq jaýapkershilikke tartyldy. Al qylmystyq iske baılanysty 42 jastaǵy kúdikti ustalyp, qamaýǵa alyndy. Tergeý jumystary jalǵasyp jatyr»,- delingen oblystyq ІІD baspasóz qyzmetiniń aqparatynda.
Buǵan deıin habarlaǵanymyzdaı , Aqtóbeniń Baıǵanın aýdany, Laqtybaı men Túgisken aýylynda úsh jylqyshy qaza boldy. Kóp uzamaı Aqtóbe qalasynda jyldyq esebin bergen aýdan ákimi Mamyrǵalı Aqqaǵazov «Abdýlǵazız» sharýa qojalyǵynda jylqyshylardyń ishimdik iship, sońy qylmyspen aıaqtalǵanyn rastady . Qylmystyq oqıǵadan soń qaza bolǵan jylqyshy Bolat Buharbaevtyń balasy Raıymbek Áıtekenov tergeýge kúmán keltirip, tilshilerge mán-jaıdy aıtyp bergen bolatyn .
