Aqtóbedegi joldardy jóndeýge 8 mlrd teńgege jýyq qarjy bólindi
AQTÓBE. QazAqparat - Bıyl Aqtóbedegi oblystyq jáne aýdandyq mańyzy bar joldardy jóndeýge 7,8 mıllıard teńge bólindi. Jospar boıynsha 298 shaqyrymdyq joldarǵa kúrdeli jáne ortasha kúrdeli jóndeý jumystary júrgiziledi, dep habarlaıdy «QazAqparat» tilshisi.
Aqtóbedegi 5 myń shaqyrym tasjoldyń 75 paıyzy júrýge jaramsyz. Ásirese, oblys ortalyǵy men aýdandar arasyndaǵy baılanys nashar. Tipti, Shalqar aýdanyna múlde kólik júrmeıdi. Bul aýdannyń halqy qatynas úshin tek temir joldy paıdalanady. Sondyqtan qatynasty qaıta jandandyrý úshin jyl ótken saıyn jol salýǵa bólinetin qarjy kólemi ósip keledi. 2016 jyly 8,9 mıllıard teńge bólinip, 74 joba iske asyryldy.
«Bıyl oblystyq, aýdandyq joldardy jóndeýge 7,8 mıllıard teńge bólindi. Barlyǵy 298 shaqyrymnan astam joldy jóndeý josparda bar. Máselen, «Dóń-Badamsha-Aqtóbe-Orsk (Reseı) baǵytyndaǵy joldyń 15 shaqyrymyna kúrdeli, 30 shaqyrymǵa jýyǵyna ortasha jóndeý júrgiziledi. Sonymen qatar, Ońtústik aınalma jol qurylysy bastalady. Joba quny 4 mıllıard teńgeden asty», - dedi oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev.
Jol qurylysy kezinde ýaqytty eseptemegender ótken jyly qarasha aıynda qar ústine asfalt tósegen bolatyn. Bul - bos shyǵyn. Jańa tehnologııaǵa kúmánmen qaraǵan Aqtóbe oblysynyń ákimi Berdibek Saparbaev jaýapty qyzmetkerlerge naqty tapsyrma berdi.
«Qar ústine asfalt tóseýdi qoıyńdar. Qandaı jaqsy tehnologııa bolǵanymen, kóktemde byt-shyt bolatynyn bárimiz bilemiz. Jumysty ýaqytyly atqarý kerek», - dedi oblys ákimi Berdibek Saparbaev oblystyq jolaýshylar kóligi jáne avtomobıl joldary basqarmasynyń esep berý jıynynda.
Altynaı Saǵyndyqova
