Aqtóbedegi jol qurylysynda kóptegen kemshilikter anyqtaldy
AQTÓBE. QazAqparat - «Jol aktıvteriniń ulttyq sapa» ortalyǵynyń fılıaly alǵashqy toqsandaǵy tekserý qortyndysyn jarııalady. Jyl basynan beri 94 synama alynyp, birqatar kemshilik anyqtaldy, dep habarlaıdy QazAqparat tilshisi.
«Respýblıkalyq deńgeıdegi joldarda 106 kemshilik anyqtaldy. Sol boıda merdigerlerge eskertý jasalǵan edi. Keıbiri birden túzetse, 42-si oryndalmaı otyr. Qazir qaıta jańartylyp jatqan joldardyń qurylys materıaldaryna saraptama júrgizip jatyrmyz. Osy kúnge deıin 6 synama standartqa sáıkes bolmaı shyqty. Kóbinde qıyrshyq tas sapasyz. Tapsyrys berýshi men merdigerlerge de eskertý jasaldy», - deıdi Aqtóbe oblysy boıynsha «Jol aktıvteriniń ulttyq sapa ortalyǵy» fılıalynyń zerthana meńgerýshisi Nurhat Balǵabaev.
Ulttyq sapa ortalyǵy merdiger kompanııalardyń joldy kútip ustaýyna qatysty da syn-eskertpeler aıtty.
«Úsh aıda 106 kemshilikti anyqtap, qazir sonyń 12-i oryndalmady. Mysaly, Qandaǵash - Embi - Shalqar - Yrǵyz baǵytyndaǵy joldyń 37-50 shaqyrym aralyǵy búgilgen, oı-shuńqyry kóp. «Samara-Shymkent« tasjolynyndaǵy asfalt jamylǵysynyń oıylyp, jarylýy kólik qozǵalysyna qaýipti. Qarabutaq aýylynan Qostanaıdyń Serenyı eldi mekenine barar jolda da osyndaı jaǵdaı. Aqtóbe men Orsk arasyndaǵy jol boıynda belgiler durys ornatylmaǵan nemese keıbir jerde joq», - deıdi ortalyq ınjeneri Qaırat Mýsın.
Ortalyq jaz boıy óńirdegi jol qurylysyn baqylap, kemshilikter tirkelse der kezinde tapsyrys berýshige habar berip otyrmaq.
