Aqtóbedegi jol-kólik oqıǵasy polıtsııanyń shala jumys istep otyrǵanyn kórsetedi - qala ákimi
AQTÓBE. QazAqparat - Aqtóbedegi Tuńǵysh Prezıdent atyndaǵy ortalyq saıabaqtyń jaıaý júrginshiler jolyna kirip ketken kólik boıjetkenniń ómirin qıǵan bolatyn. Búgin qala ákimi Іlııas Ispanov bul oqıǵaǵa jol-patrýldik polıtsııa qyzmetiniń de jaýapty ekenin aıtty, dep habarlaıdy QazAqparat tilshisi.
Aqtóbeniń ákimi Іlııas Ispanov jergilikti polıtsııa qyzmetine tártipti kúsheıtýdi tapsyrdy. Qalalyq máslıhat depýtattarynyń aldynda «jol-patrýldik polıtsııa qyzmetinde jemqorlyq bar» degen ákim Tuńǵysh Prezıdent atyndaǵy ortalyq saıabaqta bolǵan jol-kólik oqıǵasyna polıtsııasynyń da jaýapty ekenin aıtty.
«Bir jylǵa jýyq ýaqyt jumys istesem de tártipti retke keltire almaı otyrmyz. Kim, qaı jerge jaýapty ekenin bilmeı kelemiz. Terrıtorııa bólingen. Ýchaskelik polıtsııa qyzmetkeri adamdarmen birge bolýy kerek. Basty problema - jaýapkershilik joq, adamdar jazalanbaıdy. Jol-patrýldik polıtsııasynda da kemshilik bar. Ol jerde jemqorlyq, basqa da quqyq buzýshylyq bar. Sońǵy oqıǵa jol-patrýldik polıtsııasy qyzmetkerleri jumysynyń shala ekenin kórsetti. Aıyppul salý, aıyppul óndirýdi de túbirimen ózgertý kerek»,- dedi qala ákimi Іlııas Ispanov.
Aıta keteıik, Aqtóbedegi jol-kólik oqıǵasynan soń boıjetken qaza bolyp , bir adam aýrýhanaǵa túsken bolatyn. Qazirgi ýaqytta zardap shekken jigittiń aıaǵyna ota jasaldy. Jaǵdaıy ortasha aýyr.
«19 jastaǵy naýqastyń oń jaq tizesine ota jasaldy. Jaǵdaıy ortasha aýyr. Al kólik júrgizýshisine psıhologtyń kómegi kerek boldy. Ol búgin óziniń shashy túsip jatqanyn aıtty. Qatty kúızeliske túsken adamda mundaı jaǵdaı bolady»,- dedi oblystyq jedel járdem aýrýhanasynyń bas dárigeri Rahymjan Arystan.
