Aqtóbedegi jol-kólik oqıǵasy kezinde qaza bolǵan qyzdyń týystary kýágerlerdi izdep jatyr
Aqtóbe qalasyndaǵy Tuńǵysh Prezıdent atyndaǵy ortalyq saıabaqta bir apta buryn jol-kólik oqıǵasy bolyp, sol jerde 19 jastaǵy Sıýzanna Gamıdova qaza tapty . Oqıǵa ornynda 19 jastaǵy júrginshi jaraqat alyp, aýrýhanaǵa tústi. Júrgizýshi de emdelip jatyr. Adam ólimimen aıaqtalǵan jol apatynan soń Aqtóbe oblystyq Іshki ister departamenti qylmystyq is boıynsha tekserý jumystary bastalǵanyn málimdedi. Arada bir apta ótken soń qaza bolǵan Sıýzanna Gamıdovanyń apasy Ekaterına Gamıdova áleýmettik jeli arqyly aqtóbelikterden kómek surap otyr.
«Men kún saıyn saıabaqqa baramyn. Bul qalanyń ortalyǵy, úlken joldyń boıy. Adam kóp shoǵyrlanatyn jerde bir ǵana kamera bolǵan jáne ol beınekamera basqa baǵytty baqylaýǵa arnalǵan. Bul ne masqara! Kýágerler, jol-kólik oqıǵasyn kózimen kórgen adamdar, bizge habarlasyńyzdar! Sol ýaqytta jolda bolǵan júrgizýshiler, beınetirkeýishke túsirilgen aıǵaq bolsa habar kútemiz. Baılanys telefonymyz: +7 701 643 23 29, +7 775 634 44 00»,- dep jazdy Ekaterına Gamıdova.
Qaza bolǵan qyzdyń apasy óz jazbasynda kóńil aıtyp kelgen týǵan-týystaryna, tanystary men kórshilerine, ustazdary men synyptastaryna, qarapaıym adamdarǵa alǵysyn bildirgen.
Aıta keteıik, oblystyq Іshki ister departamentiniń baspasóz qyzmeti aýrýhanada em qabyldap jatqan júrgizýshi saýyǵyp shyqqan soń ǵana qandaı da bir shara qoldanylatynyn aıtty.
«Tergeý júrip jatqan soń Qylmystyq-protsessýaldyq kodekske saı aqparat bere almaımyz. Negizinen Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha is qozǵaldy, sot aldy tergeý júrip jatyr. Іstiń mán-jaıy anyqtalýda.»,- dedi oblystyq ІІD baspasóz qyzmeti.