Aqtóbedegi jol-kólik oqıǵasy kezinde aıaǵy synǵan jigit otaǵa daıyndalyp jatyr
AQTÓBE. QazAqparat - Aqtóbedegi jol-kólik oqıǵasy kezinde oń aıaǵy synyp, bas-mı jaraqatyn alǵan jigit aýrýhanada jatyr. Dárigerler naýqasty otaǵa daıyndaýda, dep habarlaıdy QazAqparat tilshisi.
Aqtóbedegi jol-kólik oqıǵasy kezinde bir boıjetken qaza bolyp, birge serýendep júrgen jigit túrli jaraqatpen aýrýhanaǵa túsken bolatyn. Qazirgi ýaqytta dárigerler jol apaty kezinde jaraqat alǵan jigitti otaǵa daıyndap jatyr.
«Jol-kólik oqıǵasy kezinde zardap shekken naýqas qazir polıtravmatologııa bóliminde em alyp jatyr. Birneshe dáriger qarap, tekserýde. Naýqastyń jaǵdaıy turaqty aýyr. Bas-mı jaraqatyn alǵan. Tekserý nátıjesinen soń oń jaq aıaǵynyń tizesine ota jasalady», - dedi oblystyq jedel járdem aýrýhanasynyń dárigeri Jaslan Ýrýmbaev. Serýendep júrip, joǵary jyldamdyqpen kele jatqan kólikten zardap shekken jigit Qostanaı oblysynyń týmasy. Týǵan-týystary keshe dárigerlermen telefon arqyly sóılesip, jigittiń jaǵdaıyn bilgen. Dárigerler naýqastyń palatasyna eshkimdi kirgizbeı jatyr.
Aıta keteıik, joǵary jyldamdyqpen kelip, Tuńǵysh Prezıdent atyndaǵy ortalyq saıabaqtyń jaıaý júrginshiler jolyna ótip ketken júrgizýshi de aýrýhanaǵa jatyr. 19 jastaǵy boıjetkenniń tós súıeginde jabyq jaraqat bar. Ota jasaýdy qajet etpeıdi.
«Túngi saǵat 12:00 shamasynda Prezıdent parkinen on toǵyz jastaǵy qyzdy ákeldi. Jaǵdaıy ortasha aýyr. Dıagnozy - tós súıeginiń jabyq synyǵy, sol jaq qoly, oń jaq tizesiniń jumsaq tinderi soǵylǵan. Naýqasqa operatıvtik em qajet emes. Es-túsin biledi», - dedi dáriger-travmatolog Muhtar Myrzabaev. 
