Aqtóbedegi jol belgilerin ornatý jumystaryndaǵy olqylyqtar aıtyldy
AQTÓBE. QazAqparat - Aqtóbe qalasynda jol qaýipsizdigi saqtalmaǵan 9 jol aıryǵy bar, dep habarlaıdy QazAqparat tilshisi.
«Aqtóbe - adaldyq alańy» jobalyq keńsesi jol-kólik oqıǵasy bolatyn aýmaqtardy nazarǵa alyp, jol belgilerin ózgertýge usynys jasady. Degenmen polıtsııa men qalalyq ákimdik arasynda baılanys joq, jol belgilerin ornatý, aýystyrý qosymsha qarjyny talap etedi. Al osy ýaqytta Aqtóbe qalasyndaǵy toǵyz jerde qaýipsizdik qamtamasyz etilmegen.
«Jol-patrýldik qyzmeti kótergen másele kóp. Jol qozǵalysynyń qaýipsizdigin qamtamasyn etý baǵdarlamasy aıasynda jol belgilerin, baǵdarshamdardy kútý, qalpyna keltirý jumystaryna jyl saıyn qarjy bólinedi. Al jańa jobany iske asyrýǵa aqsha az aýdarylyp tur. Máselen, avtobýs toqtaıtyn orynǵa bıyl 5 mıllıon teńge bólindi. Qalanyń bas dańǵylyndaǵy baǵdarshamdy alyp tastap, jańa aıaldama salý jumysyna ol aqsha jetpeıdi. Maýsym, shilde aıynda merdiger kompanııaǵa aqsha aýdara almadyq, biraq olar óz jumysyn atqaryp jatyr. Qazir boıaý alatyn aqsha tappaı otyrmyz, qazynashylyqta túsim, aqsha joq», - dedi TÚKSh, jolaýshylar kóligi jáne avtomobıl joldary bólimi basshysynyń orynbasary Rýslan Tóreǵalı.
Polıtsııa qyzmetkerleri ákimdikke eskertý, tipti usynys berýden sharshaǵan eken. Endi olar oblys ákimine qaýipsizdik úshin qajetti jumystardy tizbektep bermek.
«Qazir jınalyp, keler jyldyń jumysyn josparlaýdy usynamyn. Qańtarda memlekettik tapsyrysqa kirse, naqty jumys atqara alamyz. Qalada qaýipsizdik qamtamasyz etilmegen joldar bar. Jol belgilerin ornatý jumysy tórt aıdan beri toqtap tur. Sebebi jumysty atqaratyn merdiger mekeme joq. Eger jol-kólik oqıǵasy bolsa, oǵan kim jaýap beretinin de bilmeımiz», - oblystyq polıtsııa departamenti jol jáne tehnıka ınspektsııa bóliminiń bastyǵy Erkin Ótegenov.
Aıta keteıik, jol qaýipsizdigin qamtamasyz etý maqsatynda baǵdarshamdy kútip ustaý, jol tańbalaryn salý, jol bergilerin ornatý, kútip ustaýǵa jyl saıyn aqsha bólinedi. Baǵdarshamdar úshin bir jylda 40 mıllıon teńge shamasynda qarastyrǵan. Oǵan kútip ustaý, aýystyrý, tehnıkalyq qyzmet kiredi. Jol tańbalaryn salýǵa 100 mıllıon teńgeden astam qarjy bólinedi. Dál sondaı qarjy jol belgilerin salýǵa qarastyrylǵan.
«Bıyl da sondaı qarjy bólindi. Konkýrs ótkizildi, utyp aldy. Tek jol belgilerin ornatý baǵyty boıynsha kelisimshart buzylyp jatyr. Tehnıkalyq qatelik bolyp, qaıta onkýrs jarııalandy», - dedi TÚKSh, jolaýshylar kóligi jáne avtomobıl joldary bólimi basshysynyń orynbasary Rýslan Tóreǵalı.
«Aqtóbe - adaldyq alańy» jobalyq keńsesi bul máseleni jergilikti ákimdik pen polıtsııa qatar otyryp sheshý, nátıjeli jumys isteý úshin ortaq jıyn ótkizýdi usyndy. Bul usynys qalalyq máslıhatta qaralýy múmkin.
