Aqtóbedegi jol apatynda zardap shekken eki adam oblys ortalyǵynda emdelip jatyr
AQTÓBE. QazAqparat - Keshe «Samara-Shymkent» tasjolynda avtobýs aýdarylyp, 9 adam qaza boldy. Qazirgi kezde zardap shekkenderdiń ekeýi Aqtóbe qalasyndaǵy aýrýhanada em qabyldap jatyr. Qabyrǵasy synǵan avtobýs júrgizýshisin quqyq qorǵaýshylar kúni-túni kúzetip otyr, dep habarlaıdy QazAqparat tilshisi.
«Samara-Shymkent» baǵytyndaǵy avtobýs aýdarylyp, ІІM Tótenshe jaǵdaılar komıteti oqıǵa ornynda 9 adamnyń qaza bolǵanyn málimdegen bolatyn. Sol jol apaty kezinde aýyr jaraqat alǵan eki adam oblys ortalyǵyna jetkizilip, aqtóbelik dárigerler em júrgizip jatyr. «Avtobýs aýdarylyp, birneshe adam qaza tapty, birneshe adam zardap shekti. 21 adamnyń ishinen altaýy sanavıatsııanyń kómegimen Áıteke bı aýdandyq aýrýhanasyna jetkizildi. Eki naýqasty Aqtóbe qalasyna ákeldik. Bireýi oblystyq jedel járdem aýrýhanasynda, bireýi oblystyq aýrýhanada jatyr. Jedel járdem aýrýhanasyna túsip, em qabyldap jatqan adam - kólik júrgizýshisi. Onyń birneshe qabyrǵasy synǵan, basyna zaqym kelgen, terisi syrylǵan. Naýqastyń jaǵdaıy turaqty, biraq ortasha aýyr. Ekinshi zardap shegýshiniń búıregine zaqym kelgen. Jazylyp shyǵady degen oıdamyz»,- dedi oblystyq jedel járdem aýrýhanasynyń bas dárigeri Raqymjan Arystan.
Aıta keteıik, eki naýqas ta esin biledi, sóıleıdi. Ázirge olardy týǵan-týystary izdep kelgen joq. «Shetel azamattary bolǵan soń biz tikushaqty emes, kólikti jiberdik. Olarǵa travmatolog, hırýrg, neırohırýrg, qan tamyrlary hırýrginen quralǵan eki brıgada jiberildi. Naýqastardy qarap, tórteýin aýdandyq aýrýhanaǵa jiberdi. Qazirgi kezde avtobýs júrgizýshisin quqyq qorǵaýshylar kúni-túni kúzetip otyr», - dedi R.Arystan.
