Aqtóbedegi jol apaty: Aman qalǵan mektep dırektorlarynyń jaǵdaıy aýyr
AQTÓBE. QazAqparat - Jol apatynan aman qalǵan eki mektep dırektorynyń jaǵdaıy turaqty aýyr. Olar Oıyl aýdandyq aýrýhanasynda jatyr, dep habarlaıdy QazAqparat tilshisi.
Buǵan deıin habarlaǵanymyzdaı, Oıyl-Qobda tasjolynda jol apaty bolyp, eki mektep dırektory kóz jumdy.
Aman qalǵan eki mektep dırektory qazir Oıyl aýdandyq aýrýhanasynda jatyr.
«Eki áıel de jansaqtaý bóliminde jatyr. Birneshe súıegi synǵan. Qabyrǵasy, buǵana, jambasy... Іsh-qurylysyn tekserý úshin shaǵyn ota jasaldy. Qazir oblys ortalyǵymen baılanysta otyrmyz. Medıtsınalyq sanavıatsııa aqyl-keńesin berdi. Jaǵdaıy turaqtalǵansha osynda bolady. Ekeýi de esin biledi. Týǵan-týystary aýylǵa keldi»,- dedi Oıyl aýdandyq aýrýhanasynyń bas dárigeri Sándibek Nurbaev.
Aıtyp óteıik, kólik júrgizýshisi men aldynda otyrǵan áıel kóz jumdy. Olar №20 mektep dırektory Baǵdat Úrimbaeva jáne №33 mektep dırektory Almıra Oraqova.
«№ 25 mektep dırektory Sholpan Baıádilova, Novyı orta mektebiniń dırektory Aqgúl Qısyqova aýrýhanada. Ózim hırýrgpin. Reanımatolog-anestezıolog, hırýrg bári jumysta. Naýqastarǵa qan quıdyq. Rentgen, ÝZD túsirdik. Sholpan Baıádilovanyń synyǵy kóp. Mereke dep ketken eshkim joq, bári jumysta»,- dedi Sándibek Nurbaev.
