Aqtóbedegi joǵary oqý orny 27 qytaılyq kompanııamen memorandýmǵa qol qoıdy
AQTÓBE. QazAqparat -Q. Jubanov atyndaǵy Aqtóbe óńirlik memlekettik ýnıversıteti 27 qytaılyq kompanııamen memorandýmǵa qol qoıdy. Óńirdegi iri oqý orny ınvestorlarǵa kadr daıyndap, qytaılyq mamandarǵa qazaq tilin úıretedi, dep habarlaıdy QazAqparat tilshisi.
Atalǵan memlekettik ýnıversıtet Konfýtsıı ınstıtýtynyń jumysyn jandandyryp jatyr. Qazaq-qytaı stýdentteri joǵary oqý oryndarynyń kelisimimen bir-birine baryp, bilimin jetildirýde. Sonymen qatar, 20 oqytýshy ózara almasyp, tájirıbelerin shyńdap júr. Búgin oqý orny Qytaı ınvestorlaryn qabyldap, kadr daıyndaý men ǵylymdy damytý jolynda birge jumys isteýge kelisti.
«Ýnıversıtet pen kompanııalar arasynda seriktestik ornatý, dýaldy oqytý júıesiniń negizinde birlese bilim berý, kompanııalar bazasynda stýdentterdi is-tájirıbeden ótkizý, jumysshylardy ýnıversıtette biliktilikti arttyrý kýrstarynan ótkizý, ǵylymı-zertteý jumystaryn júzege asyrý úshin aldyn-ala kelissóz júrip, bir baılamǵa keldik. Ýnıversıtet óz tarapynan kompanııalardyń óndiristik suranystaryna oraı munaı-gaz isi, ekonomıka, fılologııa mamandyqtarynda qosymsha bilim traektorııalaryn meńgerýge múmkindik beretin bilim baǵdarlamalaryn jasaqtady. Sondaı-aq, munaı-gaz isi, kólik, kólik tehnıkasy jáne tehnologııasy, beıorganıkalyq, organıkalyq zattardyń hımııalyq tehnologııasy, qurylys mamandyqtarynda dýaldy oqytýdy engizý qolǵa alynýda. Stýdentter úshin praktıkalyq, zerthanalyq sabaqtar, dıplomdyq jobalar boıynsha izdenister, óndiristik tájirıbeler sol kompanııalarynda uıymdastyrylatyn bolady»,- dedi Q. Jubanov atyndaǵy Aqtóbe óńirlik memlekettik ýnıversıtetiniń rektory Baýyrjan Erdembekov.
Aıta keteıik, yntymaqtastyq memorandýmyna qol qoıǵan kompanııalar arasynda «SNPS- Aqtóbemunaıgaz» AQ, «Uly Qabyrǵa» JShS-i sekildi iri óndiris oryndary bar. Baýyrjan Erdembekov óndiris oryndarynyń basshylaryna kompanııa bazasynda ýnıversıtet kafedralarynyń fılıaldaryn ashýdy usyndy.
«Oqý orny men Qytaı kompanııadary arasyndaǵy kelisim shartqa eki aı boıy daıyndaldyq. Munaı-gaz isi, tehnıkalyq mamandyq ıeleri men tilshilerdi sol kompanııalardyń suranysyna saı, jańa tehnologııamen oqytýdy josparlap otyrmyz. Sonymen qatar, Konfýtsıı ınstıtýty arqyly Qytaı kompanııalaryn qazaqtandyrý máselesi qolǵa alyndy. Buǵan deıin oblys ákimi Berdibek Saparbaev Qytaı komanııasynyń jumysshylarymen kezdesýinde eskertý jasaǵan bolatyn. Suranys bar, olar qazaq tilin úırengisi keledi»,- dedi ýnıversıtet rektory.
