Aqtóbedegi jer qatynastary bólimi múgedekter úshin qoljetimsiz
Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqtóbe oblysy boıynsha departamenti «Kadam Plus» múgedek balalar qoǵamdyq uıym ókilderimen birlesip memlekettik qyzmettiń qoljetimdiligin tekserdi. Bul joly «jasyryn satyp alýshy» ádisimen Aqtóbe qalasy, Alǵa, Muǵaljar, Temir jáne Oıyl aýdandarynyń jer qatynastary bólimderi baqylaýǵa alyndy.
«Shara barysynda jer qatynastary bólimderinde azamattar jáne múmkindigi shekteýli azamattar úshin qolaıly jaǵdaıdyń joq ekeni anyqtaldy. Onyń ishinde pandýs, qyzmetkerdi shaqyrý batyrmasy, salqyndatqysh, qyzmet kórsetýge arnalǵan arnaıy bólme joq. Sonymen qatar, qyzmet berýshilerdiń kabınetinde ákimshilik kedergiler bar jáne múmkindigi shekteýli azamattarǵa arnalǵan ájethanalar sanıtarlyq talaptarǵa sáıkes kelmeıdi»,- dep habarlady Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqtóbe oblysy boıynsha departamentiniń baspasóz qyzmeti.
Baqylaý kezinde memlektetik qyzmetkerler jer ýchaskesiniń nysanaly maqsatyn ózgertýge sheshim berý saýaldary boıynsha qyzmet alýshylarǵa naqty aqparat bere almady. Bul suraqtyń bárin olar memlekettik korporatsııaǵa joldap otyrǵan. Tekserýden soń departament jer qatynastary bólimderine memlekettik qyzmetter zańnamasyn saqtaý jáne halyqqa qolaıly jaǵdaı jasaý boıynsha tıisti usynystar berdi.