Aqtóbedegi jas kelinshektiń ólimi: Sotta jańa málimetter jarııalandy
AQTÓBE. QazAqparat – Aqtóbelik Gúldana Nurmaǵanbetovanyń ólimine qatysty sot otyrysy jalǵasyp jatyr. Sarapshylar sábıli bolýdy armandap, em qabyldaǵan jas kelinshektiń ólimine tek dáriger emes, ortalyqtyń basshylary da kináli dep esepteıdi, dep habarlaıdy QazAqparat tilshisi.
№2 Aqtóbe qalalyq sotynda Gúldana Nurmaǵanbetovanyń ólimine qatysty birneshe tyń málimet aıtyldy. Sotta sóz alǵan qazirgi oblystyq sanıtarlyq-epıdemıologııalyq baqylaý departamentiniń ókili Gaýhar Igilikova eki ret tekserý júrgizilgenin, quqyqbuzýshylyqtyń óte kóp tirkelgenin málimdedi.
«Bul qaıǵyly oqıǵaǵa tek dáriger emes, ortalyqtyń basshylary da kináli dep esepteımin. Munda em-shara júrgizýge arnalǵan birneshe hattama bar. Ortalyqtyń birneshe basshysy bar ekeni de málim boldy. Al akýsher-gınekolog Olga Lı-Ko-Shın-Feterde ÝDZ júrgizýge ruqsat beretin sertıfıkat bolmady. Sonymen birge naýqas es-tússiz qalǵanda qutqarýǵa múmkindik beretin arnaıy qurylǵy tabylmady, jedel járdem kesh jetti. Biz eki ret tekserý júrgizdik. Sonda emdeý orny jatyrdaǵy tútiksheniń ótkizý qabiletin arttyratyn gıdrotýrbatsııa ádisin qoldanýdy toqtatpady. Tipti 300-ge jýyq kelinshekke osy em túri qoldanylǵan. Biz málimetti quqyq qorǵaý organdaryna berdik, ózimiz esh shara qoldana almaımyz», - dedi Gaýhar Igilikova.
Sonymen birge sot otyrysyna anestezıolog-reanımatolog Anýar Joldın qatysty. Ol da bul medıtsınalyq ortalyqtyń jaýapsyzdyǵy men salǵyrttyǵynan bolǵan qaıǵyly oqıǵa dep sanaıdy.
«Mundaı em anestezıolog-reanımatolog dárigerdiń qatysýymen jasalýy tıis. Al medtsınalyq ortalyqta mundaı maman múlde bolmaǵan. Ári anafılaktıkalyq shok alǵan kezde qajetti dári-dármek qoraby men qural-jabdyq tabylmady. Saldarynan jas kelinshek kóz jumǵan», - dedi Anýar Joldın.
Eske salsaq, 20 jastaǵy Gúldana Nurmaǵanbetova ótken jyldyń qazan aıynda Aqtóbe qalasyndaǵy «Álııa» medıtsınalyq ortalyǵynda kóz jumdy. Aıdos pen Gúldana Nurmaǵanbetovter bir jyl boıy sábı súıe almaǵan soń jeke emhanaǵa baryp, gınekolog dárigerge qaralǵan. Keshendi em júrgizýdi usynǵan dáriger Álııa Shargaraeva keıin jas kelinshekti akýsher-gınekolog Olga Lı-Ko-Shın-Feterge tapsyrady. Operatsııa jasaǵan da sol dáriger. Aldyn ala boljam boıynsha G.Nurmaǵanbetova anafılaktıkalyq shoktan kóz jumdy.
