Aqtóbedegi zaýytta kúıik shalǵan taǵy bir jumysshy kóz jumdy
AQTÓBE. QazAqparat - Aqtóbe hrom qosyndylary zaýytyndaǵy oqys oqıǵadan soń aýrýhanaǵa túsken 32 jastaǵy jumysshy qaıtys boldy, dep habarlaıdy QazAqparat tilshisi.
Zaýytta kúıik shalǵan eki jumysshy aýyr hálde oblystyq jedel járdem aýrýhanasyna jetkizilgen bolatyn. Sol jerde bir apta em qabyldaǵan 32 jastaǵy júrgizýshi búgin kóz jumdy. Aýrýhananyń bas dárigeri Sáken Qapanovtyń aıtýynsha, onyń denesiniń 60 paıyzyn kúıik shalǵan.
Aıta keteıik, 28 mamyr kúni zaýyttaǵy syıymdylyǵy 50 tekshe metr bolatyn bóshkeni tazartqan tórt jumysshy oqıǵa ornynda mert boldy. Al ekeýi aýrýhanaǵa túsip, em qabyldaǵan edi. Qylmystyq kodekstiń «Abaısyzda eki nemese odan da kóp adamnyń ólimine ákep soqqan eńbekti qorǵaý erejelerin buzý» baby boıynsha tergeý bastaldy. Ýchaske sheberi, bólim bastyǵy jáne №4 tseh bastyǵy ustaldy. Olar tergeý aıaqtalǵanǵa deıin qamaýda otyrady.
