Aqtóbedegi zaýyt ottegi ballondaryn tegin toltyryp beredi
AQTÓBE. QazAqparat – Aqtóbe ferroqorytpa zaýyty óńirdegi emdeý mekemelerine ottegi ballonyn toltyryp berip otyr, dep habarlaıdy QazAqparat tilshisi.
Aqtóbelik kásipkerler dári-dármek, qajetti preparattar men qural-jabdyq satyp alýǵa kómektesti. Al Aqtóbe ferroqorytpa zaýyty kún saıyn ottek ballondaryn tortyryp berýdi óz mindetine alǵan. 28-maýsymnan bastap 5,5 myńnan astam ottegi ballony toltyrylyp, aýrýhanalar men ýaqytsha ortalyqtarǵa jetkizildi.
«Olar bizden kómek suraǵan kezde, biz birden jaýap berdik. Búginde bizdiń qyzmetkerler, ıaǵnı, ottegi bóliminiń sheberleri táýlik boıy jumys isteıdi. Eshqaısysy jumysyna shaǵymdanǵan emes. Óıtkeni olar adam ómirin saqtap qalýǵa atsalysyp jatqanyn jaqsy biledi. Basqa tsehtar mundaı jumystyń júrip jatqanyn estigende, áriptesterine kómekke jibere bastady. Qoldaý bildirgeni úshin alǵysymyzdy bildiremiz», – dedi «Qazhrom» TUK» AQ prezıdenti Arman Esenjolov.
Aıta keteıik, ottek ballondary jeke emhana janynan ashylǵan provızorlyq ortalyqqa, temirjol aýrýhanasy, Aqtóbe medıtsına ortalyǵy men «Shaǵala» shıpajaıyndaǵy provızorlyq ortalyqqa jetkizilip beriledi. Sonymen birge zaýyt ottek ballondaryn qosýǵa qajetti qural-jabdyqpen qamtamasyz etti.
«Zaýyt kómektesti, alǵys aıtamyz. Bosaǵan ballondardy birden áketip, ottegi toly ballondardy jetkizip beredi. Jumysshylaryna basymyzdy ıemiz. Olar dárigerlermen birge myńdaǵan adamnyń ómirin ólimnen arashalap qaldy», – dedi «Darý» klınıkasyndaǵy provızorlyq ortalyqtyń bas dárigeri Izolda Kalandııa.
Aıta keteıik, emdeý oryndaryna qajet bolǵan soń 130 ballon berildi. Zaýytta shamamen táýligine 300 ballon tortyrylady.
«Jumysshylar Bobrov qondyrǵylaryn jasap berdi. Temir jonýshylar ottegi jetkizýge arnalǵan qosalqy bólshekti tańdaýǵa jáne ony jasaýǵa kómektesti. Táýlik boıy tynymsyz eńbek etip júrgen jandarǵa rızamyz», - dedi
Aqtóbe medıtsınalyq ortalyǵynyń bas dárigeri Rústem Isaev.
